Lebih 800 peranak minta kasih perintah nyeleti jalai ti balat jai
MIRI: Lebih 800 peranak ari tujuh rumah panjai ba Sungai Peking, Tinjar ditu minta perintah berunding lengkas nyeleti pendiau jalai alun tama ngagai genturung pendiau sida ke majak jai kelebih agi maya musim landas.
Jalai alun Sungai Peking sepanjai 18 kilometer ari Jalai Ladang PJP Ekang-Banyok enggau 22 kilometer ari Pasar Long Lama tu diatu nyau deka kepung enda ulih lawa laban jalai ke ditengah ninting hari nyau majak rusak sereta mar ditujah ngena entukar.
Kelimpah tujuh buah rumah panjai nengan jalai nya, sitak nya bisi sebuah sekula primari iya nya SK Sungai Peking ke balat bepanggai ngagai jalai alun nya.
Pejalai ngagai genturung pendiau enggau sekula nya begunaka pengelama tiga jam pejalai ari pasar Miri.
Nitihku peranak menua nya, pendiau jalai alun tu nyau majak mar ditengah lebih agi maya musim landas tu laban ukai semina lichin tang mega belutak lalu ngujungka pedis ditengah entukar.
“Berebak enggau nya, entukar ukai semina mudah tegelinchir tang suah lap ba jalai ke balat ngeruang, lalu maya hari ujan jalai nya semina ulih ditengah kerita 4WD, enda ulih ditengah entukar mit,” ku siku peranak menua nya.
Kenu ku iya, sekeda jalai alun nya lebih agi ba sekeda kilometer enda jauh ari palan ke dipadah chukup balat rusak nyau baka palan kerebau melangkan.
Jalai alun nya ukai semina mayuh ngeruang tang belutak ngujungka entukar 4WD ke ulih nengah nya pan lap enti nadai peneleba nengah jalai baka nya.
“Diatu semina entukar (4WD enggau lori aja ulih nengah jalai nya ngelawa genturung pendiau,” ku peranak menua nya.