Sekula China di Sarawak deka nerima agih belanja RM7 juta
KUCHING: Kepala Menteri Datuk Patinggi Abang Johari Tun Openg madahka agih belanja RM7 juta ngagai sekula peribit China ba Sarawak ungkup taun tu.
Kenu ku iya, tu endang agih belanja tambah ari perintah nengeri dibanding enggau RM6 juta ba taun nyin kemari.
“Aku nemu, pekara pelajar endang beguna amat lalu chukup semak ba ati bansa China lalu ngelama tu perintah nengeri sigi semampai mantu sekula-sekula China, ba taun nyin kemari urung RM6 juta udah diberi.
“Ba taun tu aku deka nambahka RM1 juta agi agih belanja lalu penyampau semua bantu ungkup taun 2018 iya nya RM7 juta,” ku iya rambau Pengerami Taun Baru China 2018 enggau Pengerami Makai Lemai Ke Ke- 39 Serakup Besai Gerempung China Bagi Menua Kuching, Samarahan enggau Serian ditu, malam ensana.
Abang Johari madah iya chukup ingatka saup komu- niti dalam meri buah penemu, sukung enggau pekara ngagai perintah.
“Ti nyata manti kitai numbuhka polisi bari ngagai semua rayat nyengkaum bansa China.
“Aku meri terima kasih ngagai sukung enggau penemu kitai ngagai perintah,” ku iya.
Udah nya, Presiden Serakup Besai Gerempung Cina Bagi Menua Kuching, Samarahan enggau Serian Datuk Richard Wee madah, semua rayat Sarawak patut beserakup lebih agi bansa China.
“Nya kebuah aku deka berunding beserimbai enggau Taun Baru China minta Parti Sa’ati Rayat Sarawak (SUPP) enggau Parti Rakyat Bersatu (UPP), kededia parti majoriti Cina beserakup nyadi siti sada ke nyarih ungkup bansa China,” ku iya.
Kenu ku iya, raban bansa China ngasaika pemedis ari pambar politik ke nyadi ba kededua parti kenyau Pengawa Bepilih Nengeri (PRN) kepenudi lalu nya udah nge- lemika penatai bansa China dalam Perintah Nengeri.
Ku iya mega, laban ke nyadi sebagi ari parti politik ke pemadu tuai ba Sarawak, SUPP ngembuan jerita ke mayuh pemujur ari lansa cherita lama.
“Nya alai, nyema UPP berakup baru enggau SUPP, nya tentu meri pengering sukung ngagai deligit iya, lalu ngagai SUPP ke beserakup, sida ulih nyadi kaban ke lebih ngasi ba Perintah Nengeri enggau Barisan Nasional Nengeri.
“Ari sukut bukai, iya mega beguna amat pemulai UPP ngagai SUPP diterima enggau ati tebuka ari bala ketuai SUPP enggau kaban sida,” ku iya.
Pengerami nya bisi digulu Menteri Dagang Antarabansa enggau E-Dagang Dato Sri Wong Soon Koh, Menteri Kaunsil Kandang Menua enggau Pengawa Berumah Datuk Dr Sim Kui Hian enggau Direktor Pengatur Pengawa ke mega Ketuai Pemesai Eksekutif Gerup KTS, Dato Henry Lau.