Kampung Kudei enggau Jalai Nanas dikelala nyadi palan mayuh kes nyerungkai rumah enggau jalai alun
KUCHING: Kampung Kudei enggau Jalai Nanas ditu dikelala nyadi palan ‘angat’ enggau indeks penyalah ke tinggi lebih agi kes nyerungkai rumah enggau jalai alun.
Ukai semina indeks penyalah tinggi, kededua sitak tu tau ngenataika pengasai ati takut ngagai komuniti.
Datuk Bandar Kuching Utara (DBKU), Datuk Abang Abdul Wahap Abang Julai madah, ngaku dua sitak tu nyadi palan ‘angat’ ukai digaga sengapa.
Tang ku iya, pekara tu diaku bepelasarka pansik enggau kerejasama piak Ejensi Anti Dadah Kebangsaan (AADK), Polis DiRaja Malaysia (PDRM), Opis Pengintu Pengelantang Pendiau Mensia Mayuh (JKM) enggau ejensi bekaul ke bukai.
“Nya kebuah DBKU taun tu deka ngerembaika Program Bandar Selamat ngagau dua sitak tu.
“Nengah program tu kitai deka matak semua piak lebih agi komuniti besemak sama besaup nagang penyalah nyadi ba sitak diri empu,” ku iya.
Iya madah munyi nya rambau dirandau pengudah bejadika ‘Bengkel Penyediaan Pelan Tindakan NKRA Mengurangkan Jenayah: Program Bandar SelamatInisiatif Pemutihan Kawasan Titik Hitam’ 2018.
Bengkel nya diatur ensana ba Bilik Seminar Allamanda, Ringkat 5, Librari Bandaraya ba Kompleks Islam Sarawak ditu.
Tandu Abang Wahap, ba DBKU udah nguna belanja urung RM6.1 juta dikena ngemujurka ‘Program Bandar Selamat’ kenyau ari 2011.
Penyampau tu ku iya enda nyengkaum agih ungkup taun ari Opis Menteri Dalam Menua (KDN) enggau Opis Menteri Pengelantang Mengeri, Kandang Rumah enggau Kaunsil Kandang Menua.
Agih belanja tu ku iya udah dikena ungkup mayuh tuju baka meri penampak, masang palan tanda, ngaga lurung jalai kaki, nyendiaka perengka pengekikun enggau mayuh agi ke bukai dikena nentuka pengelikun sereta nagang pengawa jai.
Berebak enggau nya, DBKU nyelinting deka ngelancharka Pelin Penegap Nentuka Pemanah, Beresi enggau Likun (CBS) DBKU Ke-2 ti mungkur semua pekara kena 1 Ogos tu beserimbai enggau ulang tahun ke-30 Kuching nyadi mengeri besai.
Pelin Penegap CBS DBKU keterubah iya dipejalai berengkah 2013-2017 nengah ‘Program Bandar Selamat’ nyadi sebengkah ari batang pengawa ba dalam pelin nya.
Nya kebuah DBKU taun tu deka ngerembaika Program Bandar Selamat ngagau dua sitak tu. Datuk Abang Abdul Wahap Abang Julai Datuk Bandar DBKU