STEM: Sarawak agi jauh ari juluk ti ditetap
KUCHING: Sarawak mengkang jauh ari juluk 60 peratus nembiak sekula belajar bengkah pelajar Sains, Teknologi, Injiniring enggau Matematik(STEM).
Menteri Pelajar, Sains enggau Pansik Teknologi Dato Sri Michael Manyin madah di Sarawak nyengkaum Malaysia, tikas nya diatu semina manggai 19 peratus.
“Ungkup kitai nyengkaum Malaysia, pemujur kitai ba pekara tu bedau ulih dikemegah ketegal juluk udah ditetap ba ikas 60 peratus.
“Tang Sarawak diatu semina manggai ikas 19 peratus ke alai ba bengkah pelajar Teknik enggau Vokasional(TVET) kitai semina ba ikas 23.5 peratus.
“Tikas tu mengkang kelalu jauh,”ku iya lebuh bejadi ‘ Asasi UNIMAS Scienceploration Camp 2018’ di Palan Islam Tun Abang Salahuddin(PITAS), Unimas ditu, kemari.
Reti nya ku Manyin nam- bah, pengudah nembuka Form 3 semina 19 peratus aja ari penyampau nembiak sekula ke patut masuk kelas sains.
“Enti sekula nya bisi enam kelas Form 4,semina siti aja kelas sains iya nya urung 20 iku nembiak,” ku iya.
Beambika chunto Sekolah Sains Kuching ditu, iya madah sekula nya ulih nerima 1, 200 iku nembiak ba taun 2018, tang semina 400 aja ke patut diterima.
Manyin nambah, pemujur enggau kuing Nengeri Sarawak jemah bepangggai ba raban nembiak sekula ke diatu.
“Enti kitai enda mujur ba STEM, kitai enda ulih ngemujur juluk kepala menteri ti deka nguasa ekonomi digital.
“STEM berat ngambi ulih nentu Sarawak ulih nempa raban orang ke landik ka tau nangkup pinta industri 4.0,”ku iya.
Penyampau 116 iku nem- biak ke udah nembuka peresa SPM sereta ke agi ba pom 4 enggau 5 ari sekula ngelingi Kuching sereta Samarahan ngulu kem nya.
Kem ke diatur dua hari berunggu berengkah kemari dikearap ulih matak pengerindu nembiak belajarka STEM.
Bela datai Sapit Naib Canselor (Akedemik enggau Antarabansa) Unimas Profesor Dr Wan Hashim Wan Junaidi, Direktor Asasi Unimas Scienceploration Kem Liyana Truna enggau Dekan Palan Pelajar Pra-Universiti Profesor Madya Dr. Ramlah Zainudin.