Entulu majak nadai nimbal bekaul enggau kuing politik iya
MIRI: Tim Gawa Khas mutarka penanggul peranak Sarawak nadai status nyadi peranak menua udah ngemendarka lebih 5,000 peminta dokumen pengelala diri ngagai orang ti patut di nengeri tu.
Menteri di Opis Menteri Besai Datuk Joseph Entulu Belaun madahka berebak enggau nya, tim nya enda kala nulak peminta dokumen pengelala diri tang begunaka timpuh lama ngenukuka penerang ti diberi sida ti minta.
“Lebih 1,000 peminta benung dipansik, kami enda kala nulak peminta sida,” ku iya madah ngagai penga- rang berita pengudah ngulu pengerami makai lemai diatur Kelab Perpaduan Miri ditu, malam kemari.
Ku Entulu, ba pekara ti nyenggala, tim nya deka ngaduka atur peminta ari orang ti nadai ngembuan status nyadi peranak nyema peminta nya ditukuka tuai rumah, penghulu tauka ketuai genturung pendiau ba kandang menua nya.
“Aku ngansak sida ti bedau nganjung peminta ngambi mansang ke mua taun tu, ngambika peminta sida ulih diatur,” ku iya.
Ba pekara ngenyit kelebih agi nembiak sekula ti berum- ban begunaka dokumen pengelala diri dikena nampung pelajar sida, Entulu ngelalau sida ngambi betanya ngagai ngagai Menteri Pengintu Pengelantang Pendiau, Komuniti,Orang Indu, Ruang Bilik enggau Pemansang Anak Mit, Datuk Seri Fatimah Abdullah ungkup bantu jampat.
Reti jaku ‘peranak Sarawak nadai status nyadi peranak’ mai reti peranak menua tu nadai dokumen pengelala diri ti dikeluarka Opis Pengerijista Bansa (JPN).
Dalam bulan November 2017, Sapit Menteri Besai Datuk Seri Dr Ahmad Zahid Hamidi lebuh program di Kuching diripot bisi madahka penanggul peranak Sarawak ti nadai ngembuan status nyadi peranak dipelaba teputar datai ba bulan September 2018.
Ahmad Zahid ke mega Menteri Dalam Menua madah kelimpah ari Entulu, Fatimah mega diberi tanggungpengawa ari Kepala Menteri mutarka penanggul nya.
Ku iya, pangku pengawa beguna endar Entulu nya deka ngasuh sida ari kandang menua pesisir ti bedau bisi dokumen pengelala diri ngambi ngembuan dokumen ti patut. MIRI: Menteri ba Opis Menteri Besai, Datuk Joseph Entulu Belaun agi ngunchi mulut iya bekaul enggau singkang iya udah tu berindik ari ripot berita ti madahka iya enda deka dichalunka baru ngentanka penuduk Parlimen Selangau maya Pengawa Bepilih Besai ke-14 (PRU14).
Enggai nimbal silik taja ditanya media bekaul enggau pejalai politik iya, Entulu, 64 taun, ke mega Sapit Presiden Parti Rakyat Sarawak (PRS) enggau penyandang penuduk Selangau kenyau 2004, semina ngilikka pala aja.
Taja pia, lebuhka dikerandau media pengudah ngulu pengerami makai lemai diatur Kelab Perpaduan Miri malam kemari, iya nyaut, “Enti udah datai ba maya ke patut, aku deka ngatur aum media”.
Presiden PRS ke mega Sapit Kepala Menteri Sarawak Tan Sri Dr James Jemut Masing diripot media minggu tu tadi ke alai penuduk Parlimen Selangau enggau Lubok Antu deka meda orang baru parti bediri minta pilih maya PRU14 tu ila.
Masing mega madahka parti nya deka ngetanka penyandang ungkup penuduk Parlimen Sri Aman, Julau, Kanowit enggau Hulu Rajang.
Entulu nyadi perati pengudah Aum Besai Pengari Tiga Taun Sekali Ke-4 PRS di Bintulu dalam taun 2016 pengudah iya dipilih baru nyadi sapit presiden parti.
Iya ti mangku penuduk nya kenyau ari taun 2006 ngalahka ex-Sapit Menteri Pemadah, Komunikesyen enggau Main Asal, lke maya nya nyadi Mandal Presiden parti, Datuk Jospeh Salang Gandum, 68 taun.
Salang, Kaban Parlimen (MP) Julau, terubah endar dipeda nyulut agi ngerebutka penuduk nya.
Salang dipeda nyadi chalun dikerindu pengudah pemerati politik pechaya iya sepenemu enggau Masing ti pulai nyadi presiden parti.
Pengudah menang ba penuduk sapit presiden, Entulu bisi mansutka jaku ke alai pemutus pengawa bepilih parti mai pesan ari bala pengari renggat baruh ti dekaka kaban parlimen sida meruan bediri maya PRU14, kelimpah enti penyandang enggai dichalunka baru. — Bernama