Seminar Ngepan Iban dilanjar ngagai Mei 2019 bekau penemu ari Jabu
KUCHING: Kelab Ngepan Betong (KNB) bisi ngatur penemuai meri basa ngagai Datuk Patinggi Tan Sri Alfred Jabu Anak Numpang di Wisma Salcra, Kota Semarahan ditu, apin lama ke udah.
Penemuai sida sebuat diuluka Chairman KNB, Tajem Sinok disempulang bala bukai nyengkaum Pemungkal Rumah Muzium Padeh enggau Koleksi Ngepan Iban, Edmund Rintai, Ketuai Raban Bansa Penghulu Sela Anak Entalang, Tuai Rumah Dennis Anak Sungkok, Kaunsilor Tuai Rumah Warrant Beti, Lemambang Manggi Munan sereta bala kaban KNB ke bukai.
Batang tuju penemuai sida sebuat deka meri basa ngagai Penaung KNB seraya minta penemu ari Datuk Patinggi Jabu pasal perambu Ngatur Seminar Ngepan Iban ti diperambu dalam bulan Mei 2018.
Belalauka penemu ditibak ari Datuk Patinggi Jabu empu, seminar ngepan Iban tu dilanjar ngagai bulan Mei 2019, meri timpuh setaun lebih endur ngelanggur, ngambika meri timpuh ti chukup endur ngatur nentuka iya ngemai pangka besai agi ngagai raban diselinting.
Ku Tajem, penemuai nya mega meri penerang silik agi pasal pangku pengawa enggau rintai aktiviti ke bisi diatur tauka disediaka raban KNB ungkup mensia mayuh kelebih agi bansa Iban ti ulih dipelajar, digulu sereta disereta sida, ti udah kala diatur, benung enggau ti deka diatur.
Antara aktiviti nya iya nya Kelas ngaga gagung, Kelas ngaga Tengak, , Kelas Ngaga Unus, Belajar Nusuk Rawai, Belajar Ngaga serta Ngukir Terabai, Belajar Ngaga Tungkin, Belajar Ngaga Tungkin, Belajar Ngaga Sirat, Kelas Nusuk Marik – Kabo, Sentagai Pedang Ilang, Tampang Sirat, Marik Pelaga, Simpai Lengan, Tumpa, Marik Rekung enggau Tikai Burit sereta Belajar Ngaga Engkerimok.
Pia mega ku Tajem, raban KNB mega bisi nyedia servis nyambut penatai enggau ngiring bala temuai dipebasa enggau ngerasukka Ngepan Bujang Berani ti disikap ngena aksesori baka kerutuk pala, taring enggau kebukai.
Sida mega deka mantaika Kajat Lelaki maya nyambut enggau ngiring bala temuai dipebasa, bebiau ngelalu pengabang, bisi mega Jaku Ansah enggau Nimang Jalung kelimpah bejualka ngepan indu enggau lelaki sereta aksesori ke bukai.
KNB mega bisi ngambuh, nempa enggau nyual Nyabur, Jempul, Langgai Tinggang/ Manuk, Ilang enggau Pedang, sereta ngaga, nyukat enggau nyual terabai.
Enda ngelaungka main asal kitai Iban, KNB mega bisi ngatur kelas Ngajat Lelaki lalu merambu deka ngatur kelas main asal ke bukai dudi hari.
Juluk ati endang besai, enti ulih, kami KNB deka ngemesaika makit ngagai tikas antarabansa, nengah makit online, bejualka semua asil tempa jari kaban kelab tu ngagai orang luar, kelimpah ari bansa Iban empu, seriris enggau juluk Kepala Menteri dalam ekonomi digital di nengeri tu, ku Tajem.
Berindik ari nya ku Tajem, Datuk Patinggi Jabu mega merambu ngambika pengawa nyadi kaban KNB patut dikerembai ngagai menua bukai, luar ari Betong empu.
“Reti iya, KNB diperansang nerima orang nyadi kaban kelab ukai semina ari Betong aja, tang belalauka pengangkun, penaluk enggau pengeran orang nya deka belajar, ngiri penemu pasal ngepan asal kitai bansa.
“Penemu tu chukup manah lalu kami deka berunding sereta ngemai pekara tu dalam aum komiti kelab udah tu ila ngambika dialuska agi ba pekara atur enggau leman iya,” ku Tajem lebuhka dirandau pengarang berita.
Datuk Patinggi Jabu mega meri sadang penemu ngasuh KNB ngatur program tu begulai enggau Dayak Culture Faundation (DCF), Univerisiti Pendidikan Sultan Idris (UPSI), Palan Pematih Pengajar (IPG) Batu Lantang, lalu pengawa tu ila diatur renggat nengeri Sarawak.
Ku Tajem, Datuk Patinggi meransang rebak baru patut angkunka main asal, pengeraja asal, keresa lama sereta belajarka gaya pendiau kitai bansa. Kitai bela nemu, tebal agi sida ke nembiak kemaya hari enda entu nemu tauka enda nemu pasal pengawa tauka gaya pendiau kitai di rumah panjai, kelebih agi ba pengelandik jari nempa keresa.
“Pekara tu ti patut endar diangkat, dibai sereta diterenak ngagai bala nembiak ngambika enda punas ngapa diseruyut jeman. Kitai chukup sayau sereta angkunka utai ditinggalka niang aki ini kitai menya, nya kebuah kitai keran lalu numbuhka kelab tu,” ku Tajem nerang.
Rambau penemuai nya, Datuk Patinggi Jabu enda muai awak berandau enggau sida sebuat ba mayuh macham pekara nyengkaum pengawa ngetanka penulin ngepan Iban kelebih agi di menua Saribas.
Kenu ku Tajem, ari penemu Datuk Patinggi Jabu, ngepan Iban Saribas endang nyelai agi ari ngepan menua bukai, taja sama bansa Iban, nadai ngira sekalika ngepan sida ke lelaki enggau iya ke indu.
Berindik ari nya, Tajem enggau sida sebuat nampung pejalai ngelawa opis Majlis Adat Istiadat Sarawak ( MAIS), betemu enggau Direktor MAIS ke baru, Datu Gani Ugay, pemulai ari penemuai meri basa ngagai Datuk Patinggi Jabu.
Penatai sida sebuat disambut manah Datu Gani ke alai MAIS endang ngelaluka pejalai enggau tuju penemuai bala sida.
MAIS minta KNB meri barang penemu ke netap tauka tetap chuan ba pekara gaya ngepan Iban Saribas ke betul enggau gaya tempa fesyen ngambika nyadi malin mensia mayuh kelebih agi rebak dudi hari.
Mais mega sedia ngatur kerejasama enggau KNB ba mayuh bengkah pekara kelebih agi ngepan enggau main asal Iban.
Ku Gani, bala kaban KNB ti landik beganu, meri jaku ansah tauka main benyawa ke bukai patut mantaika pengelandik sida lalu dirikot, ngambika ulih ditampung rebak baru.
“Ukai mayuh tubuh bala lemambang tauka sida ti landik ba main asal tu agi ngemeranka iya, bisi sekeda udah ngelengka pengudah megai pengarap baru. Bisi mega ke bukai nyau enda entu bepengerai sereta regas ba pengawa tu.
“Nya kebuah beguna endar kitai ke bisi diatu, nengah pelasar ke bisi disedia, ngerikot, nyalin tauka sebarang pengawa ti tau ngetanka main asal benyawa tu.
“Mayuh chara ulih dikena kitai nampung pengawa sida ke tuai, lalu siti ari chara iya ngiri penemu, ngajar enggau nerenakka pengangkun ba main asal tu,” ku Gani nerang silik.
Nangkan nya, Ngepan Iban udah nyadi siti ari batang jurai ba pengawa Symposium Kebudayaan Dayak ti udah diatur dalam bulan Julai 2017 nyin tadi, lalu pekara tu deka dipejuraika lenak agi ba Symposium Ngepan Iban 2019.
Ba lansa sama, Sandine Bennidect mega sepenemu enggau Tajem seduai Gani ba pengawa ngatur seminar tauka symposium Ngepan Iban tu.
Ku iya, tu siti berita chukup manah sereta dianti, kelebih agi ngagai raban ti endang rinduka ngepan asal kitai bansa.
“Aku ngarapka semua kitai enda bebantahka penemu senentang ngepan, lain ai lain ga ngepan iya. Pia mega kitai enda tau ngumbai ngepan sanu enda manding tauka salah, tang kitai patut agi berunding nyeleti, nyeruri enggau ngemanah bi bagi ke patut enggau betul.
“Ba penemu aku, ukai semua orang ke bisi degree landik pasal ngepan, tang orang ti ngembuan ngepan landik agi ari orang ke nadai ngepan laban bisi mayuh bida sida ke bisi enggau ke nadai.
“Laban ari penemu enggau peneleba aku empu, bida diasaika orang bisi ngepan, sida nemu agi rurun ngerasuk, ni tipak ke patut sereta mayuh pekara bukai pasal ngepan.
“Kebuah pia laban ngepan kitai Iban bisi besibil mimit, enda sebaka ketegal pekara rampa menua enggau kereban dikena ngaga baka jelu, ai enggau utai tumbuh.
“Nya alai, pekara tu endang patut dipejurai lenak agi ngambika penemu tu tadi tau dikunsi sereta dikerembai tauka ditampung rebak baru,” ku Sandine nyimpul penemu diri.