Parti nya milih Subeng Mula entara kaban ditaga ulih menang ba PRU tu
SARATOK: Parti Demokratik Progresif (PDP) udah meri rintai kepenudi nama chalun dipilih sida ti deka ngetanka penuduk Saratok ngarika Barisan Nasional (BN) maya Pengawa Bepilih Besai (PRU) ti deka datai.
Kaban Kunsil Nengeri (ADUN) Meluan, Rolland Duat enggau Kaban Kaunsil Supreme PDP, ku Kaunsilor Sebastian Janting rambau ngelansa pasal pekara tu maya Program Pemesai Begulai Enggau Rayat di Rumah Jamu, Pelikong, Sebetan semak ditu malam Hari Empat, madahka parti nya udah milih Subeng Mula entara kaban ditaga ulih menang parti.
Rolland udah dipaduka parti nyadi Direktor Operasyen ngagai raban gawa bepilih iya ungkup sitak Saratok, madahka Subeng, 54 taun, udah dipilih belalauka penau akademik, peneleba gawa enggau penau nyadi ketuai.
“Nitihka diperati PDP naka diatu, Subeng iya nya chalun BN ungkup Saratok laban parti udah nganjung nama iya ngambika diperunding bala ketuai tetinggi BN,” ku iya.
Tambah mega ku iya, penuduk Saratok udah diungkup ngagai PDP di baruh agi BN lalu iya mujur ditanka Tan Sri William Mawan Ikom ti bediri minta pilih ngena tikit BN-PDP lebuh pengawa bepilih ke dulu suba.
Pengudah Mawan badu agi nyadi kaban PDP, parti udah ngiga chalun ditaga ulih menang ke bukai ari gempung sida ngambi ngetanka penuduk Saratok, ku iya nandu.
Baka Mawan agi nyadi Kaban Parlimen BN, iya endang patut gawaka sitak nya kelebih agi ngagihka belanja enggau projek pemansang perintah.
Nya alai, nadai salah bala ketuai komuniti ngulu pengerami diatur pengari rayat BN nyengkaum penyandang MP Saratok.
Ba pekara ke sama mega, bala ketuai komuniti nyengkaum bala tuai rumah, kapitan, ketuai genturung pendiau patut anang berasai nangi ngulu program diatur PDP kelebih agi iya ti ngaul bala menteri tauka pengari rayat ari PDP.
Baka pengari rayat ari parti komponen BN ke bukai, bala kaban kunsil nengeri (ADUN) tauka Kaban Parlimen (MP) PDP mega sebagi ari sistem ngenataika servis BN, ku iya nerang.
Nitih ku Rolland, iya udah dilempaika pengandal ngagihka belanja pemansang sepenyampau RM6 juta nga- gai bala pengundi di Saratok ti mungkur sitak Krian, Kalaka enggau Kabong.
Iya ngagihka RM3 juta ungkup ti diarika parti penyakal, bala pengundi nadai ngasaika Projek Mit Pemansang Menua Pesisir (MRP) taika agih belanja Program Transformasyen Menua Pesisir (RTP) baka sida ti diarika BN.
Kalaka enggau Kabong bela diagihka RM1.5 juta laban diintu bala ADUN sida empu, ku Rolland nerang.
Rolland minta semua ketuai komuniti nganjung peminta sida, nagih belanja ungkup sida ngambika muntang agi ngeluarka chek.
Berebak enggau program nya, Rolland bisi ngemendarka agih belanja penyampau RM20,000 ngagai Komiti Pemansang Enggau Pengelikun Genturung Pendiau (JKKK) Rumah Jamu enggaa RM5,000 da agi ungkup Biro Indu iya.
Ku Sebastian, Subeng udah dipilih nyadi chalun PDP tunggal ungkup Saratok lalu semina nganti nama dibantaika bala ketuai tetinggi BN aja.
Pengudah Subeng dituku nyadi chalun BN, semua kaban parti komponen BN deka nyukung iya, ku Sebastian, seraya nambah, pemenang iya deka madamka saru penemu pengawa nyalunka chalun penuduk parlimen dia.
Tuai Rumah Jamu Akang, ngarika peranak rumah panjai enggau sida ti bisi datai mantaika sukung tegap ngagai Subeng nyema iya dituku nyadi chalun BN.
Ku iya, urung 500 iku nyengkaum 33 tuai rumah panjai, tiga iku kapitan China enggau siku penghulu China nedat ruai 21 pintu bilik rumah panjai ti tebal agi bala kaban Parti Pesaka Bumiputera (PBB) enggau penyukung talukka BN.
Pia mega, iya ulih nyamin ke alai sida deka meri undi ngagai barang sapa ti bediri minta pilih ngena tikit BN, ku Jamu madah nyemetak.
Ketuai Nembiak PDP Krian, Kaunsilor Jeffery Jimbu madahka PDP udah ngaga pemutus pengudah beratika pemanah pengawa sekeda kaban parti ditaga ulih menang ti udah gawa ngagai renggat baruh ngelakuka diri nyadi chalun kenyau ari taun 2016.
“Pengawa ngelakuka diri udah manggai ba tikas ke alai parti udah mutus nyalun semina nama Subeng aja nyadi chalun parti deka ngetanka penuduk Saratok. Nya alai kitai diatu mai iya ngambika dikelala nyadi chalun BNPDP,” ku iya nerang.
Nitihka diperati PDP naka diatu, Subeng iya nya chalun BN ungkup Saratok laban parti udah nganjung nama iya ngambika diperunding bala ketuai tetinggi BN. Rolland Duat ADUN Meluan