PKR Sarawak agi nyalam chalun ti bisi penau bediri ba Limbang
KUCHING: Parti Keadilan Rakyat ( PKR) Sarawak deka nyabung siku chalun ke bisi penau menang bediri minta pilih di penuduk Parlimen Limbang maya Pengawa Bepilih Besai Ke14 (PRU14) ila.
Chairman PKR Sarawak, Baru Bian madahka chalun nya datai ari raban profesional sereta bepenau ti deka ngasuh rayat di Limbang begau.
“Orang tu nyadi chalun pemadu manah kitai di Limbang lalu aku andal iya deka ngasuh rayat di Limbang begau, nyengkaum semua kita ila,” ku iya rambau aum pengarang berita nyerumba Pengerami Taun Baru China (TBC) diatur parti nya di Opis PKR Nengeri ditu, kemari.
Baru ti nyalam penerang silik pasal sapa bagi chalun nya mega madahka parti nya mega udah bisi semua nama chalun ti deka bediri di penuduk ti udah diagihka ngagai sida.
Taja pia ku Baru, rintai kepenudi nama chalun deka diputuska bala ketuai tetinggi parti.
“Semua ti deka bediri minta pilih patut ngenukuka diri ari ketuai parti lalu aku andal pemutus deka digaga enggau jampat nyangka ketegal PRu14 deka diatur sebarang maya,” ku Baru.
Baru mega bisi ngilas madahka Dr Michael Teo Yu Keng antara chalun ti deka bediri baru di penuduk Parlimen Miri laban iya ke nyadi penyandang sereta chalun pemadu bepenau ungkup penuduk nya.
Ngelansa pasal pengerami TBC kemari, ku baru, iya nyadi pengawa dikemeran dalam PKR nyadi pengeran parti mansang ngagai menua diuwan pupu bansa.
Iya mega ngangkatka Sarawak nyadi model ngagai Malaysia, ke alai tetiap rayat datai ari pupu bansa enggau jalai pengarap, ulih ngintu pengerami enggau lantang nyengkaum pengerami ke bukai.
Nyerumba pengerami nya, Baru mega mai semua rayat bela ngetanka pengelantang nengeri enggau menua tu.
Sama bisi datai Mandal Chairman PKR Nengeri, See Chee How ti nyadi tulang belakang pengawa ngatur pengerami nya begulai enggau Mandal Presiden Indu PKR Nasional Voon Shiak Ni. SIBU: Program Pejalai Raban Perwira, Pugu Pengelantang, Komiti Pengerai Zon Sibu udah mujur diatur ba Kem Rascom ditu, kemari.
Program nya dipenyadi Ketuai Direkter Servis Pengerai Leftenan Jeneral Dato’ Dr Ya’akob Koming.
Sekeda ari atur pengawa ke bisi maya program tu iya nya, ‘Fit For Life’, ngerejister veteran enggau sida specialist outreach, licha KOSPEN, licha badu nginsap enggau licha Psychology First Aid.
Sama bela datai maya tu iya nya Direkter Pengerai Markas Angkatan Tentera Mejar Jenaral Dato Pahlawan Dr Samiran Sarijan, Direkter Pengawa Berubat Brigedier Jeneral Dato Dr Md Amin Muslan, Panglima 9 Briged Brigendier Jeneral Dato’ Dzulkafli Mustaffa enggau Presiden Veteran Soldadu Malaysia Nengeri Sarawak (PVTMS) Thomas Ling.