Jaku dipansutka presiden parti sebedau tu chukup senutuk enggau merit ke patut ungkup raban indu PRS: Doris
KUCHING: Lebih 50 peratus pengundi ba genap enam sitak parlimen ke dipenggi Parti Rakyat Sarawak (PRS) diarika orang indu lalu raban nya minta dipebasa, dinah enggau adil, ku Ketuai Bagi Orang Indu PRS Dato Sri Doris Sophia Brodie.
Berindik enggau nya, iya netapka jaku pemutus Presiden PRS Tan Sri Dr. James Masing ti deka nyabung ketuai ari raban orang indu ba Pengawa Bepilih Besai Ke14(PRU14) senutuk enggau merit ke patut ungkup orang indu PRS.
“Enti diperatika ba pengawa orang indu dalam PRS, urung setengah tauka lebih ari penyampau pengundi di semua penuduk parti ngarika orang indu, sekalika ba maya pengawa bepilih nengeri enggau pengawa bepilih besai.
“Tu mandangka raban orang indu nyadi ‘King Makers’ ba semua penuduk PRS.
“Kami deka nentuka semua kaban orang indu dalam parti enggau orang indu bukai ngundi chalun PRS tauka Barisan Nasional (BN) ba PRU14 tu,”ku iya.
Doris mansutka jaku nya ba ‘Bengkel Siap Siaga Gerak Gempur Wanita PRS’ ke dipenyadi Masing ba sebuah hotel ditu kena Hari Enam tu tadi.
Nitihka penerang Doris, statistik naka suku ketiga taun 2017 mandangka 50 peratus pengundi ke berejista di enam sitak parlimen PRS diarika orang indu.
Ku iya, di Parlimen Sri Aman bisi 32,733 pengundi berejista lalu ari penyampau nya 16,423 tauka 50.17 peratus ngarika orang indu.
Di Lubok Antu 20,758 pengundi berijista ke alai 10,382 tauka 50.01 peratus ngarika orang indu.
Di Julau ngerikod 12,353 pengundi lalu 24,936 tauka 49.54 peratus (orang indu) ke alai di Kanowit bisi 20,959 pengundi berejista lalu 10,803 tauka 51.54 peratus ngarika orang indu.
Di Selangau ku Doris, bisi 29,939 pengundi ke alai 15,028 tauka 50.20 peratus diarika orang indu lalu di Hulu Rajang 27,363 pengundi ke alai 13,780 tauka 50.36 peratus orang indu.
Tajapia, Doris madah pinta nya ukai ketegal sida (bagi orang indu) deka ngelaban chalun lelaki tauka ketuai ari bagi lelaki dalam parti.
“Ke amat kitai sama bela landik, bela ulih ngereja pengawa. Semina nganti diberi peluang lalu ngarap runding ke suah miakka lelaki dilunggarka mimit,’ku iya.
Masing ba jaku bejadi bengkel netapka chalun ari raban orang indu PRS disadang disabung di sitak parlimen Selangau tauka Lubok Antu.
Enti diperatika ba pengawa orang indu dalam PRS, urung setengah tauka lebih ari penyampau pengundi di semua penuduk parti ngarika orang indu, sekalika ba maya pengawa bepilih nengeri enggau
besai.” pengawa bepilih Dato Sri Doris Sophia Brodie Ketuai Indu PRS