Dr Rayong meransang komuniti China begempung nyukung BN
ENGKILILI: Kaban Kunsil Nengeri (ADUN) Engkilili Dr Johnical Rayong Ngipa meransang komuniti China begempung enggau nyukung bala ketuai dibaruh iring Kepala Menteri Datuk Amar Abang Johari Tun Abang Openg sereta Barisan Nasional (BN) ngambi pulaika penegap politik.
Nitih ku iya, bansa ketiga pemadu mayuh di nengeri tu pengudah komuniti Dayak enggau Melayu enda ulih majakka ulah ngenyauhka diri sereti bisi ati silau laban tu deka ngasuh pinta sida lemi maya minta hak ari perintah.
“Nya kebuah, sebarang sentimen ti dibantai ba media rama tauka berita ditabur ngena mulut patut diserenih lenak enggau silik laban kitai enda patut nejuka diri alah ajum penemu orang bukai,” ku iya.
Iya mansutka jaku nya lebuh bejaku ba Pengerami Nerima Pengabang Taun Baru China 2018 di SJK(C) Chua Hua, Engkilili ditu, apin lama ke udah.
Sama bisi datai ngulu pengerami nya iya nya Pemesai Pelajar Pelilih Lubok Antu Thomas Kanyan, pengari Kaban parlimen (MP) Lubuk Antu Kaunselor Zaini Aji, bala kaban Kaunsil Pengatur Pengawa Sekula, kaban Serakup Apai Indai enggau Pengajar (PIBG), bala ketuai raban bansa, apai indai sereta bala nembiak sekula nya.
Pia mega ku iya, komuniti China kelebih agi di DUN Engkilili, taja nyadi bansa minoriti tang semua peminta enggau hak sida nadai kala enda dikeibuh, sebaka enggau bansa Iban enggau Melayu ke bukai.
“Aku pengari rayat ngagai semua bansa ke bisi di DUN tu lalu tetiap peminta kita kelebih agi ba pengawa ngagihka pemansang enggau geran MRP nadai kala ngelaung, bela mimit sama mimit, asal meh semua ulih ngasaika iya, laban tu hak kitai ke nyadi pengundi enggau peranak Engkilili,” ku iya.
“Patut dikeingat niang Tok Nan lebuh agi idup suah madahka bansa China ukai orang datai lalu tu mega diaku Menteri Besai Datuk Seri Najib Tun Razak di renggat Perintah Besai.
“Nya alai aku ngarapka komuniti China begulai enggau perintah bela gawa enggau mansutka penemu sereta muai runding enda dikeibuh laban semua kitai peranak Sarawak lalu rayat Malaysia,” ku iya seraya nambah, tuju sentimen negatif ti dibai penyakal semina dikena nginti undi aja.
Ngelansa pasal pengerami nya, Dr rayong dekaka iya seruran diatur laban nyadi pelasar pemadu manah ngempuruka bansa enggau ngerapitka tanggam kaul antara apai indai enggau pengajar nengah PIBG.
“Tu ngayanka kitai majak tuai runding lalu nemu pengawa ke bansa tu relevan endar dikena nerenakka penyerakup pupu bansa di DUN Engkilili lalu aku endang nyukung pengawa sekula ngatur pengerami tu,” ku iya.
Dulu agi ari nya, antara isi program nyengkaum tanda singa enggau tanda main asal ari bala nembiak sekula. Bala pengabang dikangau datai mega diberi awak mantaika pengelandik nulis kaligrafi tulis China sereta nunyau ‘Lou Shang’ sebedau tembu enggau pengawa meri angpau enggau buah limau mandarin ngagai bala nembiak sekula.
Berebak enggau pengerami nya, Dr Rayong mega bisi nyuaka chek ngagai Chairman PIBG SJK(C) Chung Hua, Engkilili Agustine Chua penyampau RM10,000 nyadi wang turu dikena sida ngatur aktiviti sekula.