Perintah semampai berunding chara ngenatai servis ungkup rayat pesisir

BINTANGOR: Perintah nadai kala nejuka rayat di kandang menua pesisir pia aja lalu semampai berundingka chara dikena nentuka servis perintah ulih datai ngagai peranak ti beguna bantu.

Pemesai Wang Perintah Besai Sarawak, Mohd Saiful Sungkih Abdullah madahka program Palan Transformasyen Komuniti Mindah Kin Kitu (Mobile CTC) nyadi inisiatif perintah meri awak ngagai peranak menua pesisir enggau menua ulu nerima servis ari perintah.

“Inisiatif program Mobile CTC nyadi siti ari bagi pengawa perintah ngenyemakka servis perintah terus ngagai komuniti enggau rayat di menua nya,” ku iya lebuh bejaku rambau Pengawa Bejadika Program Mobile CTC di Bintangor apin lama ke udah.

Ku iya, Opis Menteri Wang nengah Unit Strategi Nasional ( NSU) dilempai pangku pengawa ngambi nyemelaka pengawa numbuh enggau pejalai program Mobile CTC.

Nitih ku iya, rambai jaku ‘Merakyatkan Perkhidmatan Awam’ nyadi pun Mobile CTC ngemujurka program dikena nangkup juluk enggau peminta rayat di menua pesisir ti mar dilawa ketegal pekara birokrasyen enggau geografi.

“Penanggul tu diputar enggau pemisi teknologi ti canggih enggau semua rayat diatu ulih ngasaika perengka guna sereta servis ari perintah,” ku iya.

Program disereta lebih 30 ejensi perintah besai enggau nengeri nengah aktiviti mandang, servis lalau, jaku penerang enggau licha sepanjai atur porgam.

Ku iya, program Mobile CTC nyadi servis mindah kin kitu ari siti endur ngagai endur ke bukai ti ngempung sereta ngemai servis besai perintah nitihka peminta menua nya berebak.

Nitih ku iya, tu nyadi siti ari insiatif Strategi Tasik Gadung Nasional (NBOS) tuju iya nyedia enggau meri servis besai perintah ti diguna peranak menua pesisir.

“Pengawa milih Mobile CTC dipejalai di Bintangor laban menua tu engkeman endar, pasar mit ti jauh ari mengeri Sarikei.

“Ungkup renggat keterubah taun tu, Perbendaharaan Malaysia Sarawak bekerejasama enggau Opis Residen Sarikei enggau Opis Pelilih Meradong ngatur program renggat ke-23 kenyau diatur ari taun 2013.

“Peranak ditu bisi penekul ari sukut perengka pengangkut kelebih agi ngagai peranak ti enda ulih disambung ngagai servis perintah,” ku iya.

Program udah dipenyadi Kaban Kunsil Nengeri (ADUN) Meradong, Datuk Ding Kuong Hiing.

Antara aktiviti bisi diatur sepanjai atur program baka Program Beripai enggau Servis Komuniti di Palan Pelajar Tumu Nembiak Mit Kemas Chung San ngaul peranak genturung pendiau enggau ejensi perintah.

Program bukai baka pekit bibat lengan, aktiviti pengeregas tubuh, panggau pemerindang ari bala artis menua tu, chabut tikit benasit sepanjai atur program.