PRU14: DAP nyabung chalun baru di Stampin, sitak bukai agi diarika bala penyandang

KUCHING: Semua penyandang ari Parti Tindakan Demokratik (DAP) di Sarawak kelimpah Julian Tan (Stampin) deka ngenanka penuduk diri maya Pengawa Bepilih Besai Ke-14 (PRU14).

Perkara ti dipansutka Chairman DAP Sarawak Chong Chieng Jen maya Pengerami ngintu Taun Baru Cina DAP ke diatur di Kuching bedau lama tu tadi.

“Semua penyandang deka ngenanka penuduk diri ba PRU14 kelimpah ari Julian Tan ti deka nyurutka diri.

“Kami(DAP) udah ngaga pemutus nyabung chalun baru Dr Yii (Kelvin), 32 tahun, ba penuduk parlimen Stampin,” ku iya.

Chong ke mega Kaban Parlimen(MP)Bandar Kuching ngarap pengundi di Stampin meri peluang ngagai Dr Yii ba PRU14 nya ila.

“Bida entara DAP enggau SUPP (Parti Rakyat Bersatu Sarawak) iya nya kitai meranka autonomi lalu enda ibuh minta pemendar ari Tun Dr Mahathir (Chairman Pakatan Harapan), endur kitai nyabung chalun baru, Dr Yii di Stampin.

“Tang SUPP, ukai prore- gatif (Datuk Patinggi) Abang Johari ke nyadi Chairman BN negeri sereta Kepala Menteri milih chalun ketegal pemutus dilempaika ba (Datuk Seri ) Najib (Tun Razak) ke nyadi Chairman BN sereta Menteri Besai,” ku iya.

Chong madah enda ngira sapa bagi chalun ngarika BN ba Stampin, semua meseti mendingka jaku Najib.

“Enti SUPP nadai kuasa nentuka chalun di Stampin, nibuh dipejurai pekara ke ulih digaga SUPP ungkup autonomi Sarawak?”

Kelimpah Chong, tiga iku pemangku bukai iya nya Andrew Wong (Sarikei), Oscar Ling (Sibu) enggau Alice Lau (Lanang) deka ngenanka penuduk diri ba PRU14.

Ba PRU13 (2013) DAP nganjung chalun bediri di Mas Gading, Serian, Mukah, Kapit, Bintulu enggau Lawas.