Program Fiesta Sehati RTM Long Lama deka diatur 2-3 Mac

MIRI: Peranak ke diau di Pasar Long Lama Baram ditesau sampal ngulu Program Fiesta Sehati RTM Long Lama kena 2 ngagai 3 Mac di Balai SJKC Tee Kee Long Lama.

Menijar RTM Miri, Zaidi Bujang madah bemacham program ti manah ungkup bala pengusung udah dirintai maya atur program dua hari berunggu nya.

Antara iya senamrobik, pekit Lombak Asen (Lumba Rayat), pekit ngelinsu ungkup nembiak mit enggau orang tuai.

Ku Zaidi program berengkah ari pukul 8 pagi nyentuk pukul 12 tengah malam mega diisi enggau licha, pengawa mandang ari ejensi perintah enggau Pekit Highlands Country Music.

Sama bisi diatur iya nya Konsert Selebriti RTM begulai enggau bala DJ MIRIfm, SARAWAKfm enggau WAIfm ( Bunyau enggau Bujap) sereta Konsert Fiesta Sehati @RTM mantaika penyanyi baka Eyqa, Urai, Bobby Laing, Nai Dinamik, Eddie Kuwing, Jolly Jengan, Florence Bulan, Desmond Yap enggau Rickie Andrewson.

Kelimpah ari nya, Mini Studio enggau lintas langsung berita semasa di TV1 deka ditayang ari taba Fiesta kelimpah program Selamat Pagi Malaysia (SPM).

Opis Residen Miri mega bisi ngatur CTC Mobile Boat seriris enggau konsep Strategi Tasik Biru Nasional (NBOS).

Tu nyengkaum ngemai mayuh bengkah opis enggau ejensi perintah nyediaka servis sida maya atur program nya baka Opis Pengerejista Bansa (JPN) enggau ke bukai.

Berindik ari nya, peranak diau besemak diperansang datai bebala mayuh ngerichahka agi Fiesta Sehati @ RTM #NgepjiitamPemungkejaie.

Kepala Menteri Sarawak Datuk Patinggi Abang Johari Tun Openg disadang datai bejadika program nya.