Tu berindik ari paya bakau nyimpan karbon enggau efektif agi
KUCHING: Mensia mayuh agi bedau nemu pemerat sereta pemanah ke dikembuan tanah paya ngagai pengelantang pendiau kitai ninting hari.
Menteri Muda Rampa Menua Datu Len Talif Salleh madah kampung paya bakau, siti eko-sistem kampung ke pengabis berat dibanding enggau eko-sistem bukai.
“Laban enti dibandingka, kampung paya bakau ulih nyimpan karbon enggau efektif agi. Laban enti kampung paya bakau ditebang, iya deka mansutka gis metana ke tau ngangatka dunya.
“Kitai beruntung endar laban agi ulih ngasaika angin ti manah laban nengeri kitai ngembuan mayuh tanah paya,” ku Len Talif.
Iya madah munyi nya lebuh bejaku ngarika Menteri Pemansang Mengeri enggau Rampa Menua Kedua, Datuk Amar Awang Tengah Ali Hasan, lebuh ngemunka atur pengawa Nyambut Hari Tanah Paya Renggat menua Sarawak 2018 di Balai Mayuhguna Kampung Telaga Air semak ditu, kemari.
Atur pengawa nya mega bela digulu nembiak sekula, pengajar Kampung Telaga Air, ejensi Perintah sereta korporat.
Taun siti nyin tadi, atur pengawa ngintu Hari Tanah Paya Renggat Nengeri Sarawak diatur di Kuala Baram (ba sitak ke dikumbai Asam Paya).
“Taun tu di Telaga Air, setipak enggau nama endur tu, lalu enti nitih kitai tu diatu semak endar enggau Taman Negara Tanah Paya Kuching, ke mungkur urung 6,600 hektar kampung kayu bakau,” ku iya.
Iya nandu baru madahka pemerat ngaga program tu laban deka mai komuniti ba tetiap sitak nya, dalam pengawa ngintu rampa menua di nengeri tu. Berindik ari pemisi pemerat iya nya enti sema Perintah ngelaika sitak nya nyadi kampung simpan (forest reserved), taman negara tauka sanktuari palan jelu liar tauka Ramsar, ngambika komuniti enda ngachau sitak nya.
“Nya deka mantu komuniti bejalaika pengawa ngemujurka asil asal ke dikembuan kitai, baik nya ikan, undang, jelu enggau utai tumbuh sereta mayuh bansa spesis bukai.
“Nyaga sereta ngintu kampung paya bakau ke digaga komuniti deka mai asil ke manah dalam timpuh ke panjai, laban enti rampa menua tu enda dijaga enggau manah, nya deka punas jemah ila.
“Perintah ngarapka pemisi kaul enggau komuniti bansa tu, ngambika kitai ulih nambah pemisi ari rampa menua baka ikan, undang sereta asil tasik bukai, enggau ke berat endar, enda nebang kayu bakau,” ku iya.
Naka kediatu di Sarawak ku iya, sitak Taman Negara Tanah Paya Kuching dikelai nyadi siti ari palan Ramsar di Malaysia.
“Di Malaysia, kitai semina bisi 7 palan Ramsar lalu Tanah Paya Kuching ti kelima dikelai dalam lis palan nya. Reti nya, sitak tanah paya nya mujur dipilih ke nitihka atur penuh dikelai nyadi palan Ramsar,” ku iya.
Kelimpah ari nya, iya nandu baru madahka kampung paya bakau ulih dikena ngurangka tasah baka ampuh bah, tanah tusur sereta tsunami.
“Tanah Paya Kuching meri sukung ke pengabis besai ngagai komuniti kitai kelebih agi ari sukut pengawa dagang temuai enggau pengawa berikan,” ku iya.
Taja pia, nitihka ripot Sekretariat Ramsar di Switzerland, sitak tanah paya sereta kualiti nya di mayuh bengkah dunya majak mimit.
“Nya alai, servis eko-sistem ti di ulih kitai ari kampung tanah paya mega sama deka ngasaika ubah eko- sistem nya, majak mimit.
“Bisi di ripot mega, pengurang tanah paya nyengkaum terumbu karang mai pengerugi ari sukut servis eko-sistem dalam urung USD 20 trilion tiap taun,” ku iya.
Sebedau nya, Pemangku Direktor Opis Kampung, Hamden Mohammad dalam jaku iya madah eko-sistem ke majak kurang ukai semina nyadi di Malaysia aja, tang ba mayuh bengkah endur di serata dunya, enda tau enda dibantaika ngagai tiap renggat komuniti ngambika servis
Laban enti dibandingka, kampung paya bakau ulih nyimpan karbon enggau efektif agi. Laban enti kampung paya bakau ditebang, iya deka mansutka gis metana ke tau ngangatka dunya. Datu Len Talif Salleh Menteri Muda Rampa Menua
eko-sistem deka majak mujur dataika jemah ila.
“Ari pengawa JHS enggau bantu komuniti, ejensi peribit sereta NGO ngelama tu, eko-sistem di Tanah Paya Kuching majak manah lalu bisi mandangka ari sukut pemayuh spesis jelu ke punas baka Lutong Kelabu, enggau Proboscis Monkey bisi udah nambah.
“Taman Negara Tanah Paya Kuching agi begunaka pansik ke silik. Nya alai, JHS ngelalau sebarang palan pelajar ke deka ngaga pansik di sitak tu, sigi dikelaluka,” ku iya.
Pemisi data saintifik tu ila, deka di ripot ngagai sekretariat Ramsar di Switzerland tiap tiga taun, alai data Tanah Paya Kuching tu deka dikemaru.
“Pemisi data ke chukup, ba sida ke ngubah polisi, bisi pemun ke tegap ngambika atur nyaga sitak tanah paya ke tusur nya digaga, lalu servis eko-sistem ulih dipajakka,” ku iya.
Ba kenang ke bukai, sida ke ngatur pengawa Nyambut Hari Tanah Paya Renggat Nengeri Sarawak 2018, bisi bejalaika mayuh macham aktiviti beserimbai enggau hari nya, baka kimpin meri penemu pasal rampa menua, ke digulu nembiak sekula sereta komuniti di sitak nya.
Sama bisi enggau ngulu atur pengawa nya kemari, Sekretari Mendam Opis Menteri Pemansang Mengeri enggau Rampa Menua, Wan Liz Othman.