Anang engkah keresa ke berega dalam santubung kaban belayan ti udah nadai
JULAU: Raban bansa Iban dilalau ngambika enda nyimpan ke dalam santubung kaban belayan ti nyau nadai enggau keresa ke berega dikena nyeliah pengawa engkubang pendam nyadi.
Kaban Parlimen ( MP) Julau Datuk Joseph Salang Gandum madah, pengawa enda beradat engkubang pendam nya diatu agi bisi nyadi baru ba Pakan, Julau enggau Song.
“Nguburka bala kaban belayan ke udah nadai enggau baya ke berega tauka keresa lama tau bendar narit orang bukai ngereja pengawa enda manah baka tu,” pia ku iya madah. Iya mantaika jaku tangkan nya maya Program Pendidikan Sepanjang Hayat dan Ramah Mesra di Rumah Andrew Ungon, Nanga Darau ditu, kemari.
Nambahka jaku iya ku Salang, Komiti Pengelikun enggau Pemansang Genturung Pendiau ( JKKK) di rumah panjai meseti bisi kaul ke manah begulai enggau piak polis sentang pengawa ngemunaska ulah nyengkubang pendam.
“Kita anang enda ngadang nyema tetemuka sekeda orang baka ke tau ngereja penyalah baka nya. “Nya alai, kaul ke manah enggau polis meseti bisi laban pengawa engkubang pendam semampai agi bisi seagi orang ke meli baya bisi belama,” ku iya madah baru.
Bekaul enggau program sehari nya, Salang madahka program baka nya sebengkah atur pengawa ke engkeman sereta besai reti. “Anang ngetu ngiga penemu lebih agi ba penemu bekaul enggau pengidup, betanam betupi tauka pengerai.
“Penemu tu ulih giga ba dini-dini endur baikka ba internet, bup, surat berita tauka mayuh agi ke bukai,” ku iya madah baru. Tang taja pan baka nya iya enda besetujuka ulah bekunsika pekara ba laman rama baka ba whatsapp.
“Bisi sekeda buah penemu ke dibantai ba laman rama nya kelalu balat sereta enda manah dikunsi enggau orang bukai. “Nambahka mega maya hari tu kitai meda mayuh raban whatsapp digaga lalu mayuh mega penemu dibantai sereta bisi nya enda amat,” pia ku iya madah.
Dulu agi ari tu Chairman Komuniti Pakan Jerenang Jawa ba jaku iya madahka program sehari nya dikena bedua penemu sentang pengidup ti bepengerai, nyeliahka penusah angus enggau pekara bekaul enggau pengelikun diri.