Pekara ti beguna ngagai BN iya nya ulih menang majoriti besai
MIRI: Kaban Parlimen (MP) Baram Anyi Ngau madahka semua deka dilempai ngagai Parti Demokratik Progresif (PDP), ngaga pemutus sapa bagi deka ngetanka penuduk Baram maya Pengawa Bepilih Besai (PRU) ila.
“Aku rindu agi neju ngagai parti kami ( PDP) enggau bala ketuai tetinggi Barisan Nasional ( BN),” ku Anyi madah ngagai The Borneo Postlebuhka dirandau rambau Program Jualan Sentuhan Kasih di Beluru, Bakong ditu, apin lama ke udah.
Tambah mega, iya andal amat bala ketuai ba renggat nengeri enggau perintah besai deka nentuka sapa bagi ti dichalun sereta ulih menang ungkup BN.
“Aku pechayaka parti enggau ejensi bekaul udah bejalai ngagai renggat baruh lalu ngelala chalun ti ditaga ulih menang.
“Pekara ti beguna endar ngagai BN iya nya ulih menang enggau majoriti besai,” ku iya nambah.
Ngelansa pasal sukung peranak di menua pesisir Baram ngagai perintah BN, ku Anyi, iya pechaya sukung tegap ari peranak di Baram deka diayan ngagai undi.
Aku rindu agi neju ngagai parti kami (PDP) enggau bala ketuai tetinggi Barisan Nasional (BN). Anyi Ngau Kaban Parlimen Baram
Anyi ngarapka peranak di sitak dipegai iya deka ulih ngaga pemutus betul milih ketuai sida nentuka sida seruran ulih ngasaika pemansang.
“Kitai enda ulih ngenggaika penyikap perengka guna pemun agi jauh tinggal di belakang.
“Taja pia, pengeran bala ketuai kitai ari renggat tetinggi udah bejalaika inisiatif mayuh bengkah pemansang di menua tu.
“Pia mega, penegap enggau sukung meruan ari rayat endang beguna endar nentuka kitai badu agi tinggal di belakang,” ku iya nambah.