Perintah nengeri patut mai perintah Sabah, Putrajaya baum berandauka MA63

MIRI: Di Sarawak, siti ari batang pekara ke balat dipejurai kandang diatu iya nya Sempekat Malaysia 1963 (MA63) lalu naka ni iya udah dipebasa, tauka enda.

MA63 udah disempekat belalauka pemereti ati ba pengandal enggau penaluk sereta iya deka meri pemaik ngagai kededua raban nitihka pekat lalu patut diturut.

Tang sayau endar, taja kitai udah taluk ngagai Federasyen, udah meri sida megai kuasa kenyau ari 55 taun ke udah, Perintah Besai nadai kala ngamatka semaya ti udah dipekat, ku Sekretari Raban Pemikir Dayak tauka Dayak ThinkTank Group (DTTG), Eva Bayang.

“Ambika chunto, bisi ditulis dalam MA63 ke alai aum patut diatur pengudah 10 taun sempekat disain. Tang pekara tu nadai diatur.

“Bacha sekali agi sempekat patut dipejalai dalam taun 1073, iya nya 10 taun pengudah sempekat disain,” ku Eva dalam penerang berita ngagai The Borneo Post kemari, (25 Febuari).

Eva nyemetak madahka mekanisme dikena mutarka petalat ke amat bisi dalam sempekat (MA63) nya.

“Pekara ti patut digaga perintah nengeri mai Perintah Sabah enggau Putrajaya setuju baum berandauka MA63, muntang baka nya aja,” ku iya.

Ku Eva, dokumen MA63 nitihka asal iya minta enda tau enda ketiga raban berandauka pejalai sempekat pengudah 10 taun iya disain, dalam taun 1973.

“Aum ke bansa nya nadai kala diatur.

“Taja pia, atur pengawa ti dikelaung nya enda deka nyadi pekara ti enda beguna, laban iya deka nyadi penerang politik bekaul enggau hak Sarawak ke alai semua penempa undangundang ari semua bida politik deka entudi.

“Ba peranak bukai, iya deka nyadi beguna endar laban bisi rikod tetap di Hansard ke alai dalam taun 2016, bisi penyerakup antara semua pengari rayat nengeri bekaul enggau pekara autonomi Sarawak,” ku iya nambah.