DTTG Miri ngarapka piak bekaul datai mantu sida Durie sebilik
MIRI: Raban Pemikir Dayak tauka Dayak Think- Tank Group ( DTTG) Pampang Miri ngarapka gempung korporat enggau Opis Pengintu Pengelantang Mensia Mayuh ( JKM) ditu datai mantu sepintu ruang bilik ditu ke seranta.
Sekretari iya, Eva Bayang madah, sida enam iku diri sebilik idup nadai ngasaika pengelantang laban rumah sida di Taman Tunku ditu nadai bekal kuasa karan pengudah diputus ketegal enda tebayarka bil.
Ketuai bilik, Durie Nyadang, 73 taun,madahka iya enda ulih tetupika sida sebilik laban semina ngandalka duit pinchin niang laki iya.
“Anak lelaki aku puntan ngiga sebarang pengawa, nyaup aku ngelempungka tating belanja nyentuk sehari tu.
“Seraya anak indu aku, ti baru udah sarak enggau laki iya, ditinggal enggau tiga iku anak ti agi besekula primari enggau tadika ditu, ngujungka idup kami tusah agi,” ku Durie.
Ku Durie, sida sebilik ngena dian enggau lampu meri penampak malam hari sereta mantu bala uchu iya ngaga kereja sekula enggau ngulang pelajar.
Nya alai, Eva minta kasih ngagai gempung korporat enggau JKM datai mantu sida sebilik.
“Aku mega ngarapka pengari rayat di kandang menua tu bisi penyiru sereta nyediaka bantu dikena mantu ngelempungka tating penusah sida.
“Aku ngarapka penusah ditapi sida sebilik deka diperatika raban ngempu tanggungpengawa enggau jampat,” ku Eva nambah.