Komuniti China di Poyut/Lubok Nibong dipinta bekerejasama enggau kapitan baru
MARUDI: Komuniti China di Poyut/ Lubok Nibong diperansang bekerejasama enggau bala Komiti Pemansang enggau Pengelikun Genturung Pendiau (JKKK) ngambika sida muntang agi ngatur aktiviti sereta begulai enggau Kapitan China ke baru dipadu mangku pengawa ari perintah.
“Pekara tu beguna endar dikena ngemai sida ngagai penegap penyerakup lalu beri kerejasama ngagai iya ngetuaika komuniti mit kita di menua kita empu, laban kerejasama tu beguna endar ngagai tetiap iku kitai.
“Baka ti udah dipadah aku dulu tadi, bala kaban JKKK patut nemu baka ni ngelanggur pemansang genturung pendiau lalu nganjung ripot ngagai Opis Pelilih ngambika raban opis nya ulih beratika peminta sida di rumah panjai tauka genturung pendiau nya.
“Nya alai, ngelansa pasal baka ni melanjaka belanja projek, bala ketuai komuniti ti enda nemu patut betanya tauka minta penemu ari bala ketuai baka bala pemancha enggau penghulu di kandang menua nya.”
Pekara tu dipansutka Sapit Speaker Aum Kunsil Nengeri (DUN) ke lalu nyadi Kaban Kunsil Nengeri ( ADUN) Mulu, Dato Gerawat Gala lebuh iya bejadika Pengerami Taun Baru China ti diatur JKKK Puyut/Lubok Nibong di sebengkah restaurant ditu, malam kemari.
Ku Gerawat kelimpah ari iya ngansak peranak di rumah panjai enggau genturung pendiau di menua Poyut /Lubok Nibong patut gawa begulai dalam siti tim ngemansangka kandang menua nya.
Ngelansa pasal bekal ai beresi ngagai Poyut/Lubok Nibong ti udah dibantaika Sapit Chairman JKKK, James Chass Gerok, ku Gerawat, isu tu ukai pekara ke baru lalu peminta nya udah dianjung ngagai raban bekuasa tetinggi.
“Aku udah madah sambung patut deka digaga sebedau Pengawa Bepilih Besai Ke14 (PRU14), abis nadai kitai udah naka ulih gawaka pangku pengawa nyadi pengari rayat ditu.
“Ngelansa pasal pengawa ngumpul uras ti udah diban- taika James mega, kitai udah berandau enggau chairman Kaunsil Pelilih Marudi (MDC) ngambika atur dipejalai.
“Sungai Poyut enggau Sungai Dabai ti seruran ampuh bah enggau penanggul bah tunggal mega udah dianjung ngagai Opis Parit enggau Entali Ai (DID) ngambika diperunding.”
Berebak enggau pengerami nya, Dato Gerawat mega bisi nyuaka surat chiri mangku pengawa ngagai Kapitan China ke baru di kandang menua Poyut, Kapitan Tie Ching Ming, 50 taun, peranak asal Foochow ari Poyut, nyilih Ong Ling Seng, ti udah tuai.
Gerawatmegangemendarka geran Projek Mit Pemansang Menua Pesisir (MRP) penyampau RM12,000 ngagai JKKK Poyut, RM3,000 ngagai SJK Hua Nam lalu RM20,000 da agi dikena nyemin lupak pejalai kaki di Pendam China Poyut.
Seraya ba lansa pasal politik, Dato Gerawat Gala ari Parti Pesaka Bumiputera Bersatu ( PBB), meransang semua komuniti China di Marudi sereta mega di kandang menua Poyut/Nibong meri sukung tegap ngagai Anyi Ngau maya PRU14 tu.
Anyi ari Parti Demokratik Progresif (PDP) nyadi chalun pemadu engkeman ngarika Baram. Naka ulih meri majoriti ngagai iya sekali tu.
Sama bisi datai lalu bisi mansutka jaku, Kaban Parlimen ( MP) Baram, Anyi Ngau, Chairman Pengatur, James Chass Gerok enggau KapitanTie Ching Ming, Sekretari Politik Kepala Menteri, Charles Balan Seling, SAO Nancy John Abau, DSP Gabriel Risut sereta Pemancha Chong Chin Hui.