Ngambi bisi pulaika pemaik ti ulih mantu komuniti di menua tu nambahka penatai pemisi, nyaga pemanah nama kompeni
BINTULU: Kompeni dalam industri, dagang enggau gempung korporat di bagi menua tu dilalau ngambika chakah agi ba pengawa ngatur program Pelaburan Sosial Korporat (CSI) dikena mantu komuniti di menua nya, pia ku Menteri di Opis Kepala Menteri (Integriti dan Ombudsman), Datuk Talib Zulpilip.
Ku iya, nengah pengawa ngatur program ke bansa nya ukai semina meri pemaik ngagai komuniti di menua nya aja, tang mega nyaga pemanah nama gempung ti beranakka puku tauka bedagang ditu.
“Ba tuju nya, aku endang mujur endar pengawa Petronas enggau anak sarikat iya baka Malaysia LNG Sdn Bhd, Asean Bintulu Fertilizer (ABF) enggau Petronas Carigali Sdn Bhd (PCSB) laban mayuh ngatur program belalauka servis komuniti dikena mantu komuniti di menua nya,” ku iya.
Iya mansutka jaku nya lebuh bejaku ba pengawa bejadi Program Fish-4-Life diatur PCSB diatur bepalan di Universiti Putra Malaysia Kampus Bintulu (UPMKB) ditu.
Pia mega ku iya, program tu mega nerima sukung ari UPMKB enggau Serakup Orang Berikan Kandang Menua (PNK) Bintulu udah meri empas positif ngagai 126 iku orang berikan ari sitak Kuala Nyalau, Kuala Tatau, Jepak, Sebauh enggau Similajau ti ngulu program tiga hari berunggu nya.
Program tu ku iya, deka muka mata enggau runding raban orang berikan di Bintulu ngambika enda semina bepanggai ba asil tasik aja, tang sida patut pintar runding bejalaika dagang alterna- tif dikena nambahka penatai pemisi sida.
“Chunto pemadu manah iya nya dagang ikan sangkar ti ulih meri penguntung besai enti sema dikereja memanah, meruan mansutka penatai belanja ngagai orang berikan taja maya musim landas mangka,” ku iya.
Ku iya, mayuh dagang ke bukai tauka pengawa nupi asil tasik ulih dikereja orang berika nentuka pemansut belanja sida enda puntan lalu bepanggai ba asil tasik aja.
Petronas udah melanja urung RM58 juta dikena bejalaika projek ngintu rampa menua sereta biodiversiti ngelinggi ti mungkur belanja RM10 juta dikena bejalaika Projek Biodiversiti, Alam Sekitar dan Pemeliharaan (BEACON) di Taman Negara Samalaju Bintulu, RM5 juta dikena ngintu kandang Gazet Rampa Menua Asal di Piasau, Miri enggau RM35 juta da agi dikena bejalaika Projek Nyaga Pantai Miri.
Chairman PNK Bintulu, Jumaat Brahim enggau Penulung Rejista Kanan ke lalu nyadi Pengari Dekan Fakukti Sains Pertanian dan Makanan UPMKB, Mohamad Syukri Mohamad Adnan enggau Menijar Besai Kanan Petronas Carigali Sdn Bhd - Sarawak Gas, Morris Mail antara bala bisi datai.