Nanya dulu ngagai JHS sebedau mansutka penerang ba media
KUCHING: Opis Kampung Sarawak (JHS) minta kerejasama semua ejensi penerit adat di Sarawak, meri kerejasama bekait enggau sebarang pengawa kayu ke (dipelabaka) salah, ngambika nanya dulu ngagai JHS sebedau ngeluarka penerang ba media.
Pemangku Direktor JHS, Hamden Mohammad madah berita selebubu ke ditabur nengah media massa bekait enggau pengawa nangkap sereta ngerampas kayu enggau keresa ke dipelabaka salah enda ulih dituku pengamai seagi sida enda betanya dulu ngagai JHS.
“Berindik ari berita ke dipadah bisi orang tauka kompeni ke ngereja pengawa kayu batang ke salah di Lawas, JHS udah mansik pekara nya. Lalu kami nganjung pemesai kami di Limbang, meresa ni pengamat berita nya.
“Nengah pansik nya, kami beratika semua kayu ke di tan polis nya udah dibayar chukai, bisi ngembuan chap ke patut, reta ke di empu Perintah Nengeri sereta dokumen bukai.
“Kayu ke kena rampas nya enda betul, lalu lebuh berita nya dipasuk ke dalam media, lalu penyampau rega kayu ke kena rampas iya nya dalam RM2.5 juta munyi ke besai endar, tang nya ukai pengawa kayu ke salah,” ku Hamden.
Iya madah munyi nya lebuh dikerandau pengarang berita pengudah nyempulang Menteri Muda Rampa Menua, Datu Len Talif ngepunka Program Nyambut Hari Tanah Kerapa Sedunya Renggat Nengeri Sarawak ba Balai Mayuh Guna, Kampung Telaga Air ditu, kemari.
Taja pia, ketegal berita selebubu nya, udah meri empas ngagai Perintah Nengeri ba renggat menua luar sereta penemu orang luar bekaul komuniti menua tu bekait enggau pengawa kayu ke salah.
“Utai ke ngirauka ati, laban enggai ke bisi NGO luar tauka gerempung bukai, ke enda lantang ati enggau Perintah Nengeri Sarawak mai forum tu keluar ari menua tu.
“Nya alai, JHS minta kerejasama semua ejensi penerit adat di Sarawak tu, meri kerejasama sida iya nya betanya dulu ngagai JHS, nyema bisi tetangkap tauka tetemuka pengawa ngerejaka kayu batang ti salah,” ku iya.
Iya nandu baru madahka, Perintah Nengeri Sarawak nengah JHS sigi nagang pengawa betebangka kayu enggau chara ke salah.
“Enti amat bisi nyadi, kami sigi enggau naka ulih nagang pengawa betebangka pun kayu enggau chara ke salah.
“Enti berita ke ditaburka enda amat, orang bukai deka ngambi peluang ngerusakka pemanah nama Sarawak.”
Iya nandu baru madahka ari statistik, lima taun ke udah, ari sukut pengeluar kayu di Sarawak, semina 0.2 peratus aja penyampau kes ke ditangkap sereta kena rampas.
“Taja pia, operasyen ngemunaska pengawa betebangka pun kayu enggau chara ke salah agi dipajakka. Kami ngaga sekat jalai alun, pengawa matau sungai sereta ngena bilun engkabang beratika pengawa salah tu enda digaga,” ku iya.
Hamden mega madah munyi tu laban nimbal pasal berita ke ditaburka ba surat berita bekait enggau kayu ke dirampas di Lawas, kena 23 Februari tu tadi ke madahka, pengawa ngerampas kayu nya mungkur urung 1,100 batang kayu, 3 buah perengka pengangkut, sebuah jengkaut enggau 3 buah lori, bekait enggau penyalah ngereja pengawa kayu nya, enda betul.
Iya madah nitihka tasat ti dipejalaika Opis Kampung, Pelilih Menua Limbang enggau Sarawak Forestry Corporation ( SFC), kena 23 Februari tu tadi tetemuka pengawa kayu nya digaga orang bempu lisin ke betul iya nya Pelita Holdings Sdn Bhd (OT9130).
Lalu nangkan nya, endur kayu ke kena rampas nya, dalam kandang endur ‘Place of Royalty Marking’ ti dikemendarka di Bukit Beriwan, di dalam lisin OT9130, lalu orang ke megai lisin nya udah dikemendarka nebang nengah ‘Permit to Enter Coupe’ (PEC) ti dikeluarka kena 16 Oktober 2017 lalu tau dikena datai ngagai 15 Julai 2018.
Iya nandu baru madahka, kayu nya udah dikelai enggau chap hak milik (MJF) lalu udah direjista di dalam ‘Daily Production Return’ (DPR) dalam Sistem REVLOG.
“Lalu, kayu tu mega udah dipadahka penyampau ‘royalty’ baka ke udah di rikod dalam Sistem REVLOG, sereta ngembuan kelai chap ‘royalty’ (JH 721) ba kededua piak ujung kayu ke dirampas nya,” ku iya.
Ku iya, nitihka penerang nya, kayu nya tau diambi lalu udah dibayar chukai ngagai Perintah.
“Lalu pemnyampau kayu ke ‘dirampas’ ti dipadahka dalam urung RM2.5 juta mega enda betul.
“Nya alai, semua penerang media bekait enggau kes pengawa ngerejaka kayu batang sereta perengka guna ti kena rampas, patut nanya ngagai JHS dulu sebedau ngeluarka penerang ba media,” ku iya.