PKS ngelaluka penyereta raban nembiak ti deka belajar kuntau
SIBU: Gerempung Kuntau Sibu (PKS) semampai nerima penatai raban nembiak ke bisi belajar kuntau nyadi raban gerempung sida.
Chairman PKS Guro Dennis Tan madah, pengeransing gerempung sida ti nerima penatai rebak baru nyadi raban ketegal ti deka meda main asal bekuntau semampai ulih ditan sereta dikerekaika nyerumba ubah pemansang dunya maya hari tu.
“Ari gerempung tu kitai ngarapka main asal bekuntau di pelilih Sibu ulih dikerembaika agi lebih agi ba sida ke rebak baru.
“Nya alai, ngambika mujur agi kitai deka meda PKS dikering enggau penyampau raban ti mayuh,” pia ku iya madah ngagai pengarang berita.
Dulu agi ari tu iya betuaika Aum Besai Ninting Taun ( AGM) PKS ditu, kilah ensana.
Sekeda ari batang randau maya aum sida tu iya nya bekaul enggau pengeransing PKS ngerembaika main asal bekuntau di pelilih Sibu.
Ba aum tu mega, PKS bisi nerima lapan iku raban baru iya nya sida ti udah megai gelar guro.
Aum tu bela dikemujurka Sapit Chairman Guro Nyawai, Sekretri Guro Edwin, Tukang Wang Lee Laja, Sapit Tukang Wang Micholas Lembang, Auditor Elizabeth Bungan sereta bala exco bukai baka Guro Philip, Guro Raymond, Guro Bonnie, Guro Hillary, Guro Labang, Guro Jemat, Guro Sintau, Guro Leslie enggau Guro Inggit.
Nambahka jaku iya ku Dennis, sekeda ari tuju penumbuh PKS iya nya meri lisin ngagai gerempung kuntau ke dipegai PKS ngajar kuntau di Sibu ditu.
Iya madah, ba PKS bisi tiga iti gerempung ke dipegai iya nya Kelab Kuntau Spring 12 Sibu, Kelab Kuntau Spring Nanggah Sibu enggau Kelab Kuntau Nyanggai Sarikei.
“Lisin tu beguna amat laban enti nadai lisin dia pengawa ngajar kuntau tau dipadahka ngereja pengawa ke salah tauka salah ari atur undangundang menua tu.
“Gerempung ke ngajar kuntau meseti bisi lisin ngambika enda ditinggang ukum nengah undang-undang,” ku iya madah baru.
Ba pekara bukai, Dennis maya tu madahka piak sida merambu deka bejadika penumbuh PKS dalam bulan April ti deka datai.
“Dikena ngemujurka agi pengawa bejadi PKS tu ila, kitai deka ngangauka siku pengari rayat,” ku iya madah baru.
Sida ke deka nyadi raban tauka deka nemu penerang silik sentang PKS tau betanya ngagai Guro Dennis nengah lumur 014-599 9633.