Lima akim sepenemu ngaga pemutus nadai merit ba apil nya lalu kes semina ulih diputarka ba Kort Syariah
KUCHING: Kort Federal kemari nulak apil empat kes peranak nengeri tu ke deka nukar jalai pengarap ari Islam ngagai Kristian ngambi dipendingka ba Kort Sivil, tang madahka kes nya ulih dipending tauka dipejalaika Kort Syariah.
Presiden Kort Apil Tan Sri Zulkefli Ahmad Makinuddin madah, kort tauka lima akim sepenemu ngaga pemutus nya nadai merit ba apil nya.
Lebuh ke macha pemutus nya, Zulkefli madahka dalam Ordinan Majlis Islam Sarawak (MAIS) bisi madahka pekara nya bisi bekaul enggau bidang kuasa Kort Syariah Sarawak.
Taja pan dalam ordinan nya nadai dipadahka pekara bekaul enggau ‘pansut ari jalai pengarap Islam’ tang bisi bekaul enggau masuk jalai pengarap Islam, lalu ke bendar Kort Syariah bisi bidang kuasa bekaul enggau isu nukar jalai pengarap.
Seksyen 68, 69 enggau 90 Ordinan Majlis Islam Sarawak ke ulih dikena Kort Syariah Sarawak mendingka pekara bekaul enggau isu nukar jalai pengarap, ku iya.
Lima panel akim ke ngaga pemutus nya Tan Sri Ahmad Maarop, Tan Sri Hassan Lan, Tan Sri Ramly Ali enggau Tan Sri Jeffery Tan sereta nyengkaum Tan Sri Zulkefli Ahmad Makinuddin.
Berebak enggau tu akim Joshua Baru ti ngarika empat iku ke ngapil nya lebuh dikerandau madah, udah tu bepanggai ba empat iku ke diarika iya sekalika deka ngemanjaika pekara nya ngagai Kort Syariah tauka enda.
“Enti deka majakka kes tu, sida patut mai kes tu ngagai Kort Syariah,” ku iya lebuh dikerandau raban pengarang berita pengudah tembu becharaka kes nya ba Kort Federal ditu, kemari.
Tiga ari empat ke ngapil iya nya Mohd Syafiq Abdullah @ Tiong Choo Ting; Jenny Peter @Nur Muzdhalifah Abdullah enggau Salina Abdullah ke megai pengarap Islam ketegal ti belaki tauka bebini.
Taja pia, Nur Muzdhalifah ke sarak ba taun 2006 enggau Salina ke sarak dalam taun 2010, pulai baru ngagai pengarap Kristian. Lalu Mohd Syafiq pulai baru megai pengarap Kristian pengudah bini iya midang dalam taun 2007.
Kes keempat iya nya Syarifah Nooraffyzza Wan Hose ti ngelengkaka pengarap Islam lalu milih megai pengarap Kristian ba taun 2009.
Responden iya nya Direktor Opis Pengarap Islam Sarawak, Ketuai Direktor Opis Pengerejista Bansa Menua, Majlis Agama Islam Sarawak enggau Perintah Nengeri.
Enti deka majakka kes tu, sida patut mai kes tu ngagai Kort Syariah. Joshua Baru Luyar