MOCAT nadai kuasa meri lisin nyadi malin temuai

KUCHING: Menteri Dagang Temuai, Seni, Adat Pesaka, Nembiak, Lumba enggau Main, Datuk Abdul Karim Rahman Hamzah madahka minta lisin nyadi malin temuai di nengeri tu di pegai opis menteri iya lalu ukai ari baruh Opis Menteri Adat Pesaka, Seni enggau Pengawa Dagang Temuai (MOCAT)di renggat Perintah Besai.

Iya madah, pekara tu berat laban kena nyeliahka orang bukai ke ukai di latih nyadi malin temuai mai temuai bejalai ba palan dagang temuai di menua tu, sereta deka ngaga batang pengawa tu, siti batang pengawa ke tetap, lalu ukai pengawa ( part time).

“Aku udah berandau enggau opis (Peguam Negeri) lalu beratika enti pekara tu ulih digaga ditu ( di Sarawak) ari terebai ngagai Kuala Lumpur ngambi kus/ lisin Malin Temuai sereta mayar ungkus kus nya entara RM6,000 ngagai RM7,000 sepala.

“Ba kus tu, siku Malin Temuai mesti nemu pasal palan dagang temuai sereta sejarah palan nya di Malaysia, tang malin temuai ke ending asal ari Sarawak, pelaba aku, enggai sida iya gawa di Semenanjung, manah agi gawa ba menua diri empu,” ku Abdul Karim.

Iya madah munyi nya lebuh bejaku ba aum pengarang berita pengudah bejadika atur pengawa hari kedua ‘Sarawak Dialogue 2018’ ke bepelasarka ‘ Sarawak Tourism Blue Print’ di sebengkah hotel ditu, kemari.

Atur pengawa tiga hari nya kemari, bela di gulu ulih penyereta ari opis dagang temuai, industry dagang temuai sereta penyereta entarabansa.

“Murah agi enti malin temuai dilatih ditu…Enti kita ngelawa Semenanjung, kita meratika malin temuai ke mai temuai bejalai di sitak menua nya, nembiak universiti tauka orang ke udah bepinchin ke gawa sementara aja.

“Enti di Sarawak, pengawa nyadi Malin Temuai ukai bansa nya, tang batang pengawa ke tetap, ukai sementara,” ku iya.

Pengudah jurai minta malin temuai belajar di menua tu aja ila, udah dikemendarka, nyangka opis menteri nya deka ngaga kerejasama enggau universiti tauka kolej di menua tu, ngelatih malin temuai lalu meri sida iya lisin (ti dikeluarka ulih opis menteri nya).

“Menua tu amat-amat begunaka malin temuai ke dilatih, laban naka kediatu sigi enda chukup. Ambika chunto baka di Miri, penyampau malin temuai ke bisi lisin, siku, dua aja,” ku iya.

Berindik ari ungkus kus malin temuai baruh MOCAT ke begunaka yuran entara RM6,000 ngagai RM7,000 sepala, ngujungka bisi malin temuai ke enda ngerijista diri empu enggau Perintah tauka ngaga pengawa ngatika diri (enda belisin).

“Entara kebuah, laban ungkus kus nya kelalu mar, sereta pedis endar bulih lisin. Nya kebuah, sida ‘ malin temuai ke enda belisin’ ngaga pengawa ngatika diri.

“Nya kebuah aku deka mansik pekara tu baru, laban lisin malin temuai kediatu diberi ulih MOTAC,” ku iya.

Dalam pekara tu ku iya, Dagang Temuai agi pegai Perintah Besai lalu enda dikelala perintah nengeri tu.

“Lebuh Malaysia digempung dalam taun 1963,dagang temuai enda dikelala lalu nadai dalam lis perintah nengeri tauka Perintah Besai tauka lis bukai.

“Lalu dalam 1994, lebuh Perintah Nnegri Sarawak ke nadai dipadah Konstitusyen Perintah Besai di ubah, pekara dagang temuai di tapuk baruh Pekara 9,” ku iya lalu nandu baru madahka Menteri MOCAT Datuk Seri Mohamad Nazri Abdul Aziz ke selalu enda lantang ati lebuh ditanya pasal dagang temuai Sarawak.

Taja pia, iya madah Perintah Menua tu enda (not giving up).

“Nya kebuah kitai bisi opis menteri dagang temuai Kediri empu, ke bejalaika dagang temuai menua tu, sereta sitak menua ke ngembuah opis Dagang Temuai Kediri empu (Sarawak Tourism Board tauka STB),” ku iya.

Ba lansa bukai, iya madahka lisin program nyemilik (homestay)di Sarawak ke sama minta ba MOCAT, deka dipansik baru.

“Kami deka mansik pekara tu baru, laban tu entara pekara ke patut digaga manah agi,” ku iya.

“Enti nitih, program nyemilik tu patut digaga di menua pesisir, ukai ba mengeri, laban di mengeri, orang ke bempu program nyemilik bepekit enggau hotel besai.

“Manah agi program tu digaga di menua pesisir tauka ulu sungai, laban temuai ari menua luar ke ka agi meda rampa menua kitai,” ku iya.

Ketegal penanggul pedis bulih lisin program nyemilik mega ngujungka sekeda orang muka program nyemilik tang nadai lisin.

“Aku nadai penanggul pemisi program nyemilik ke enda belisin, tang asal perengka guna digaga manah sereta beresi, enti atur tu ditetapka ila,” ku iya.