SCaT Fair 2018 bisi nyendiaka 5,500 iti pengawa puang kena 9-11 Mac

KUCHING: Bisi 5,500 pengawa puang ke deka disediaka beserimbai enggau Sarawak Career & Training Fair (SCaT Fair) 2018 kena 9 ngagai 11 Mac tu ila ba Palan Konvensyen Borneo Kuching (BCCK).

Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madahka peluang gawa nya disediaka 67 kompeni dalam mayuh bengkah industri ke nyereta pengawa pemansang nya.

“Mayuh peluang gawa ari renggat tinggi ngagai baruh deka disediaka tang nya bepanggai ngagai raban nembiak lebih agi graduate milih bidang ti dikedeka,” ku iya ba aum pengarang berita SCaT Fair 2018 ba BCCK ditu, kemari.

Berebak enggau tu Len ti mega chairman begulai SCaT Fair madahka bisi 1,500 iku nembiak lebih agi ari kandang mengeri tu nyengkaum ari bagi menua Kota Samarahan enggau serian deka dibai ngela pengawa pemandang.

Ku iya, setipak enggau objektif pengawa pemandang ke nyadi platform nyendiaka penerang pasal peluang pelajar enggau pengawa ngagai mensia mayuh, kelimpah ari nyendiaka raban graduet tauka bala nembiak ke tau diambi gawa.

Kelimpah ari nya, Len ti mega chairman Tabung Ekonomi Gagasan Anak Bumiputera Sarawak (Tegas) madah, Tegas mega deka ngatur ‘STEM Playground’, pengawa pemandang bekaul enggau ruang bilik ti interaktif dikena meransang pengerindu kelebih agi nembiak dalam bidang Sains, Teknologi, Injinir enggau Matematik (STEM).

Ku iya, STEM Playground ke sekali tu deka diatur ngena chara besai sereta mayuh aktiviti ti ngerindu pengudah keterubah iya diatur nyerumba SCaT Fair 2007 udah narit lebih 10,000 iku orang datai.

STEM Playground 2018 deka mungkur 18 ejensi iya nya Opis Pelajar Sarawak, Perbadanan Ekonomi Digital Malaysia (#MYdigitalmaker), Shell Malaysia, Petronas, Makerspace Pustaka Negeri Sarawak, DreamCatcher, Chumbaka, Universiti Te- knologi Swinburne Sarawak, Universiti Curtin Malaysia, UCTS, Unimas, UiTM Sarawak, Politeknik Kuching, Petrosar Academy, Codelab, Kumpulan Syarikat IME, Planetarium Sultan Iskandar enggau Azendian Solutions Sdn Bhd.

Pengawa ngerejista nyereta STEM Playground 2018 tau direjista nengah stemplayground.eventbrite. com.

Next Big Chef mega deka diatur iya nya pekit bepanduk ti diatur Universiti UCSI ba taun kedua nyerumba SCaT Fair, enggau kerejasama Tegas dikena ngelakuka pengelandik enggau seni kulinari sereta peluang gawa dalam bidang nya.

Pemenang nya ke sekali tu deka mai pulai mata duit, midul enggau setipikit sereta nyengkaum skolarsip ari Universiti UCSI ti berega RM22,500.

Kelimpah ari nya, Len madahka SCaT Fair 2018 diatur begulai entara Opis Menteri Pelajar, Sains enggau Pemansik Teknologi enggau Tegas mega bisi ngatur beberapa siri licha ti betajuk Kejuruteraan Sebagai Karier, Industri 4.0, Bagaimana Menjadi Doktor Perubatan, Program Peneraju enggau Biasiswa YM Raja Azura Raja Mahayuddin sereta mayuh agi.

SCaT Fair 2018 ti dpasuk 153 orang ti mandang nyengkaum semilan penyedia bantu wang, 67 ari industri (nyendiaka peluang gawa), 70 ari institusi (nyendiaka latih) enggau tujuh ari ejensi perintah, dipelabaka dipenyadika Kepala Menteri Datuk Patinggi Abang Johari Tun Openg kena 10 Mac.