Projek ngangkatmanah empat sekula lama di Sibuti chakah dipejalai

MIRI: Empat buah sekula ti udah lama enggau jai dalam sitak Parlimen Sibuti nerima agih belanja dikena ngangkatmanah sereta ngaga baru.

Kaban Parlimen ( MP) Sibuti, Datuk Ahmad Lai Bujang madahka tu nyengkaum Sekula Primari (SK) Kita Niah, SK Rancangan Sepupok enggau dua buah sekula ke bukai.

“SK Kita Niah enggau SK Rancangan Sepupok udah bulih pemendar tumu perintah besai lalu diatu projek ngangkatka pemanah enggau digaga baru benung dipejalai,” ku iya, ditu.

Ku Ahmad Lai, berindik ari penusah ampuh bah besai suah nyadi di kandang SK Kita Niah, ke alai sekula nya digaga baru ngagai taba baru.

“Projek SK Kita Niah beungkus RM40 juta lalu deka dipindah ngagai endur ke tinggi agi besemak enggau Masjid Al-Jabbar Niah,” ku iya nerang.

Seraya SK Rancangan Sepupok, kereja ngangkatka pemanah benung chakah dipejalai enggau agih belanja semua nya penyampau RM30 juta.

Kededua projek tu ku iya deka tembu dalam timpuh dua taun lalu deka meri pemaik enggau pengelantang ngagai bala pengajar enggau nembiak.

“Dua buah sekula ke bukai deka dulu agi ngena belanja perintah nengeri lalu nya di baruh patau Opis Pelajar Sarawak,” ku iya nerang.

Ba lansa bukai, projek ngaga Jematan Bekenu beungkus 24 juta deka tembu dalam bulan Jun tu ila.

Naka diatu, projek tu nyauka manggai 95 peratus tembu lalu pengawa nyambung jalai ngelawa genturung pendiau besemak mega benung chakah dipejalai.

Ungkus ngaga RM24 juta nya nyengkaum pengawa ngaga jematan sepanjai 70 meter enggau pemesai 11.43 meter.

Pengawa ngelancharka projek ngaga jematan nya udah dipenyadi niang Kepala Menteri Datuk Patinggi Tan Sri Adenan Satem dalam taun 2015 suba.