Program transformasyen baru DE matak pemulai raban biak di menua tasik
MIRI: Program transformasyen baru nengah ekonomi digital di Sarawak udah meransang prospek pengidup meruan jemah ngagai peranak Sarawak ke biak kelebih agi bansa China ti diatu belajar di menua tasik.
Kepala Menteri Datuk Patinggi Abang Johari Tun Openg berasai lantang raban nembiak kelebih agi bansa China mantaika pengingin sida deka ngemansangka kereja diri empu di nengeri tu, pengudah tembu belajar di menua tasik.
“Diatu mayuh rebak nembiak China chukup rindu deka mulaika diri laban sida bisi meda pengidup dalam program transformasyen ba ekonomi digital.
“Aku kala betemu enggau sekeda nembiak ke belajar di London ke alai tiga iku ti belajar dalam ekonomi madah ngagai aku sida deka mulaika diri ngagai Sarawak laban sida ulih meda ekosistem enggau bisi pengerindu nampung kereja sida dalam teknologi moden tu,” ku iya lebuh bejaku ba Gempuru Taun Baru China (CNY) diatur Gerempung Federasyen China Bagi Menua Miri Sarawak di Hotel Imperial ditu bedau lama udah.
Nya alai, Abang Johari dekaka peranak Sarawak anang ngembuan ati nangi ba program transformasyen baru dipejalai di nengeri tu laban nengeri nyingkang ba pejalai ti betul.
Iya udah nya muji penau bansa China meri mayuh penemu ngagai nengeri dalam pemansang lalu ngarapka rebak nembiak bansa China ke diatur belajar di menua tasik deka nampung pemanah pengawa ti udah digaga sida ke tuai ngepunka pemansang ti bisi dipeda kitai di Sarawak.
Iya meri Miri chunto ti nyengala nyadi lambang pemujur komuniti China, ke alai semina enggau penyerakup sida ulih ngangkatka mengeri ngagai mengeri makai angin ti richah.
Komuniti China ku iya nambah, endang mayuh usah nyaup ba pengawa ngemesaika Miri lalu diatur mengeri nya nampung nyadi mengeri makai angin chukup richah adap Utara Sarawak.
“Tuai Megai Menua (TYT) Tun Pehin Sri Abdul Taib Mahmud rambau iya megai kuasa nyadi Kepala Menteri Sarawak udah nempa penyerakup ti chukup tegap dalam nengeri tu kelebih agi di Miri.
“Komuniti China meri jasa chukup besai ngagai pemansang Miri. Visyen kita ngangkatka Miri nyadi mengeri endur ngelantangka ati udah nyadi nyata nengah sukung ari peranak di mengeri tu.
Seraya ngintu penyerakup pupu bansa enggau pengelantang jalai pengarap dalam nengeri tu, iya minta rayat nunda ubah pemadu baru dalam pengidup moden.
“Tu maya kitai berubah, kitai engka patut ngubah pekara ba renggat pemansang enggau nasit kitai bisi tim ti tegap endar enggau kitai nampung pejalai lalau nyadi nengeri mansang datai ba taun 2030.
“Tu kebuah kitai mutuska meransang Sarawak ngagai ekonomi digital mungkur teknologi ngambika pemansut kitai ulih dipegulai enggau teknologi lalu meri kitai nilai (rega) tambah ngagai pemansut ti dikembuan kitai dikena nyadi pemain ngagai ubah baru rampa ekonomi dalam nengeri tu.
Bisi 700 iku temuai bisi datai ngulu gempuru ti dipenyadi TYT Tun Pehin Sri Abdul Taib Mahmud enggau bini iya, Toh Puan Datuk Patinggi Ragad Kurdi Taib.
Sama bisi datai Menteri Muda Dagang Temuai, Seni enggau Main Asal Datuk Lee Kim Shin, Menteri Muda Elektrik Menua Pesisir Dr Abdul Rahman Junaidi, exSapit Kepala Menteri Datuk Patinggi Tan Sri Dr George Chan enggau bini Datin Patinggi Puan Sri Datuk Lorna Enan Muloon, Datuk Bandaraya Miri Adam Yii, Presiden Serakup Federasyen China Bagi Menua Miri Sarawak Hii Teck Yun, chairlady pengatur Wong Siew Wei sereta bala kaban bansa China ke bukai.