Ngambika kitai nemu sapa ti bisi kuasa ngemendarka orang bepengarap Islam pansut ari jalai pengarap nya, ku Simon Poh
KUCHING: Rayat nengeri tu dipinta ngambika ulih sereta meretika pasal empat kes peranak nengeri tu ke deka nukar jalai pengarap nitihka undang-undang ti sah.
Archbishop Roman Catholic Archdiocese of Kuching, Simon Poh madahka kes nya ukai deka nyabung dua jalai pengarap belaya tang deka ngiga chara dikena mutarka kes nya.
“Bala bakih ti dikesayauka aram mih kitai meretika pekara tu enggau lebih manah agi.
“Tu ukai kes gerija ngelaban Islam, tang kitai deka nemu sapa ke bisi bidang kuasa ngemendarka orang bepengarap Islam pansut ari jalai pengarap nya sekalika Kort Syariah tauka kort Sivil.
“Lalu laban Kort Syariah bisi kuasa nyaga orang bepengarap Islam, nya alai kort nya bisi kuasa nentuka orang bepengarap Islam nama bagi ke patut nitihka undang-undang,” ku iya.
Berebak enggau tu, iya madahka nadai sapa ti alah tauka menang kes tang ke pemadu beguna iya nya kini ke patut dituju sekalika Kort Syariah tauka Kort Sivil, ti semina dikena minta pemendar undang-undang.
Nengah penerang iya kemari, Simon mega ngarapka perintah ulih nentu sereta netapka undang- undang ke nadai bechiping dikena betapi enggau isu ke baka nya.
“Aku bisi datai enggau mending ngagai kort lalu akim ngaga pemutus enggau neutral sereta nadai bechiping,” ku iya.
Tu ukai kes gerija ngelaban Islam, tang kitai deka nemu sapa ke bisi bidang kuasa ngemendarka orang bepengarap Islam pansut ari jalai pengarap nya sekalika Kort Syariah tauka kort Sivil. Simon Poh Archbishop Roman Catholic Archdiocese of Kuching
Lebuh ke ngenang pasal bisi penyarut nyadi pengudah pemutus pechara nya kemari baka ke dikerembaika ba media rama, Simon madahka diri manah aja sereta nadai utai enda manah nyadi.
Iya meri puji laban mayuh orang ti bepengarap Islam ke datai ngagai kort nya kemari nyaga sereta ngelindung iya ari penyarut tauka laya sekeda orang bepengarap nya lebuh ke pansut ari kort nya.
Kemari, Kort Federal ditu ngaga pemutus nulak apil empat kes peranak nengeri tu ke deka nukar jalai pengarap ngambika dipendingka ba Kort Sivil, tang madahka kes nya ulih dipejalaika ba Kort Syariah, bepelasarka pekara ke bisi diungkupka dalam ordinan Majlis Agama Islam Sarawak.
Kelimpah ari nya, Sapit Ketuai Majlis Islam Sarawak Datuk Dr. Juanda Jaya lebuh ditanya bekaul enggau pemutus Kort Federal nya, madahka semua piak patut ulih bebasaka pemutus ke udah digaga kort nya.
Juanda mega ngarapka pemaik enggau pengelantang bansa enggau jalai pengarap nengeri tu ulih ditanka rayat nengeri tu.
“Kitai ngawakka kort ngaga pemutus. Lalu kitai patut ulih bebasaka pemutus ti digaga kort.
“Sarawak udah lama nyadi chunto penyerakup bansa enggau jalai pengarap. Nyadi tanggungpengawa semua rayat sayauka Sarawak lalu ngetanka pekara tu.
“Anang ngelakka raban orang ke deka ngeruga pemaik enggau pengelantang ke udah ditampung kitai kenyau beratus taun ke udah,” ku iya meri penerang nya nengah WhatsApp, kemari.