Karim dekaka SFC, Opis Menteri Dagang Temuai besaup ngintu Taman Negara

KUCHING: Menteri Dagang Temuai, Seni, Adat Pesaka, Nembiak, Lumba enggau Main, Datuk Abdul Karim Rahman Hamzah minta sebagi ari tanggungpengawa di Taman Negara di Sarawak ke baruh pegai Opis Sarawak Forestry Corporation (SFC) dikunsi enggau opis menteri iya, ngambika perengkaguna dia ulih dikemansangka manah agi.

“Ke diatu, Taman Negara di Sarawak ari baruh pegai opis SFC ukai baruh opis menteri kami, ukai baka di Sabah, Taman Negara ari baruh pegai Opis Menteri Dagang Temuai,” ku Abdul Karim.

Iya madah munyi nya lebuh bejaku ba aum pengarang berita pengudah bejadika atur pengawa hari kedua ‘Sarawak Dialogue 2018’ ke bepelasarka ‘Sarawak Tourism Blue Print’ di sebuah hotel ditu, kemari.

Iya madah enti ulih, minta sebagi ari Taman Negara menua tu dikunsi enggau opis menteri nya.

“Enti ulih, aku minta sekeda (enda semua) Taman Negara menua tu dikunsi enggau opis menteri kami, kelebih agi taman negara ke suah dilawa temuai, ngambika ulih ama dijaga ulih SFC enggau opis menteri kami.

“Opis Menteri kami benung mansik pekara tu laban pemerat SFC ba taman negara, sida iya nyaga sereta ngintu taman negara nya,” ku iya.

Iya nandu baru madahka, enti dagang temuai masuk, SFC bisi penambah perengka guna bukai alai sida iya ulih ngangkatka taman negara nya ngagai dunya luar, laban taman negara sigi bepengeraja enggau rampa menua.

“Nya kebuah, kami minta sebagi ari tanggungpengawa nya dalam kandang opis menteri kami, Nyaga, Ngibun sereta Ngangkatka Taman Negara,” ku iya.

Atur ba taman negara ke diatu ku iya, malin temuai ari industri dagang temuai enda dikemendarka masuk ngagai taman negara nya, laban SFC bisi malin temuai Kediri empu.

“Lebuh temuai ari datai enggau malin temuai sida iya empu, sida iya semina di asuh nganti ba jalai penama aja, lalu enda dikemendar disempulang ulih malin temuai sida laban renjer/ malin temuai taman negara nya deka mai bala temuai nya bejalai dia.

“Malin temuai taman negara ulih di ajar pasal taman negara, bansa kayu tauka nama jelu, ni bagi utai ke tau dipegai, bagi ke enda ulih, ulih diajar memagang,” ku iya.

Kelimpah ari nya, iya madah, perengkaguna ba taman negara di menua tu mayuh enda dijaga enggau manah, rusak tauka kamah, alai wang turu kena ngadu perengka guna tu datai ari SFC.

“Nya kebuah, aku deka meda pengabis kurang pan, bekunsika tanggung pengawa nyaga sereta ngibun sekeda ari taman negara nya.

“Taja pia, pengawa tu enda ulih diteju lama endar, laban Sarawak benung ngangkatka industry dagang temuai di menua tu, penerebai bilun pan mayuh masuk ke menua tu, temuai majak datai... Laban enti perengka guna tu enda di adu enggau manah, semina ngenyaika nama kitai aja,” ku iya.

Taman Negara di Sarawak entara taman negara ke tebilang di dunya, baka Taman Negara Bako, Palan Jelu Liar Matang, Semenggoh, Mulu enggau Niah (di Miri.

“Perengka guna enda nyapai tikas peneka kitai, nadai stindit kelebih agi chalets enggau agu.

“Temuai ari menua tasik tauka menua tu empu sigi betatika pekara bansa tu, ke deka meda perengka guna kitai beresi, jeti ngagai taman negara tu, nyengkaum pengelikun sebedau niki perau ke Taman Negara Bako laban sungai endur mudik nya penuh enggau baya,” ku iya, lebuh madahka timbal ke diterima ari temuai.