‘Dasar 1Murid 1Sukan’ pelasar ngelakuka lumba enggau main
KAPIT: Sapit Menteri Pemansang Menua Pesisir enggau Kandang Menua Datuk Alexander Nanta Linggi kena pagi Hari Dua udah bejadika Majlis Sukan Sekolah Bahagian (MSSB) Kapit Ke-40 diatur empat hari berunggu berengkah ari 27 Febuari ngagai 2 Mac, di Padang Lumba enggau Main ditu.
Nanta lebuh ke bejaku nyemetak madah siti ari strategi nasional dikena ngelakuka lumba enggau main iya nya nengah ‘Dasar 1Murid 1Sukan’ nyadika pelasar dikena ngajar bala nembiak sekula chakah ngaul diri dalam lumba. Ku iya, pemanah batang tuju ngajar gaya idup bepengerai ari pengawa chakah ngaul diri dalam lumba enggau main.
“Dasar 1Murid 1 Sukan’ nyadi pelasar ngajar bala nembiak sekula regas ngaul diri dalam lumba lalu pemanah batang tuju tu ngajar sida ngemeranka gaya idup bepengerai ngambika bala nembiak ulih nyapai pelajar holistik ti sebela ba tubuh enggau penemu lebuh besekula.
“Nengah lumba enggau main mega deka ngajar pemanah disiplin, ulah ti meruan sereta nempa pemanah ulah,” ku Nanta.
“Nembiak ti bepengerai ulih belajar enggau meruan. Taja pia, bisi apai indai enda entu meransang bala anak sida ngaul diri dalam lumba enggau main. Sida tu semina dekaka bala anak nyulut dalam akademik.
“Ulah ke baka tu patut dibuai laban perintah nengah mayuh bengkah ejensi meransang rayat chakah ngaul diri dalam lumba enggau main ngajar pengerai ti manah,” ku iya.
“Lumba enggau main diaku di serata dunya nyadi penempa penaluk beraban enggau kerejasama. Lumba ngempung penyelai besai enggau asal penatai peranak Malaysia sereta ngempung sida negutka pemanah kaul enggau pengelantang komuniti,” ku Nanta nambah.
Berebak enggau pengawa sehari nya, iya bisi ngemendarka geran perintah penyampau RM30,000 ngagai Opis Pelajar Lumba, Rekreasyen enggau Kelab Pengintu Pengelatang Rama (PSKPP) Kapit.
Berebak enggau nya Pemesai Pelajar Kapit, Gawan Saut meri terima kasih ngagai komiti pengatur diketuaika SMK Kapit ti udah kiruh gawa nentuka pemujur MSSB Ke-40 Acara Trek enggau Padang.
Bisi sepuluh tim bepekit iya nya SMK Katibas, SMK Song, SMK Kapit, SMK Kapit 2, SMK Selirik, SMK Baleh enggau SMK Belaga - MSSD Song, MSSD Kapit enggau MSSD Belaga.
Pekit empat hari berunggu udah disereta 539 iku atlit enggau 118 pengajar lumba. Batang tuju pekit tu dikena milih atlit Kapit ti deka dianjung bepekit dalam Majlis Sukan Sekolah Negeri Sarawak (MSSS) diatur berengkah ari 23 ngagai 27 April di Kuching.
Ku Gawam, SK Nanga Merit menang penuduk lumur tiga dalam Pekit Sepak Takraw Nasional 2017.
Taun tu, sepuluh atlit dipilih ngarika Sarawak ngagai pekit nasional iya nya enam iku belanda neresa kampung, tiga iku Sepak Takraw enggau pemain ragbi.
Chairperson pengatur, Azlinda Mohd Nor, Pemesai Pelajar Song Duncan Luta, Pemesai Mangku Pengawa Aktiviti Kurikulum Kumbong Garit, chairman Kaunsil Kepala Pengajar Kapit Demang Sawing, Sekretari Politik Kepala Menteri Sarawak Maurice Giri enggau Tapah Ata antara bala bisi datai ngulu pengawa bejadika pekit nya.