Pelajar, penemu patut dikemerat dikena ngemansangka pengidup
SARIKEI: Penemu enggau pelajar nyadi pemun ngagai ubah pengidup dudi hari, nyingkang mansang ke mua enggau besemekih ngena chara ti manah dalam jeman dunya globalisasyen ti majak mar kemaya hari.
Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madah penyedar pemesai guna pelajar patut diperati bala apai indai, kelebih agi ke diau di genturung pendiau enggau rumah panjai.
“Kitai enggaika komuniti di kandang menua pesisir tinggal ari sukut pelajar. Nya kebuah, bala ketuai perintah suah ngelalau enggau meri penyedar ngagai komuniti menua pesisir bekaul pemesai dunya pelajar.
“Enti dipeda enggau komuniti di kandang mengeri, kelebih agi ari sukut pelajar, komuniti kandang menua pesisir bisi tinggal. Di mengeri, komuniti iya udah nemu iya nya nyulut ba sukut pelajar ti nyadi pun semua pekara.
“Dikena pansut ari penyeranta lalu mansang dalam dunya, besemekih dalam mayuh macham bidang, semua begunaka pelajar nyadika pelasar keterubah nya. Nya alai, kitai dekaka komuniti di menua pesisir mega beratika pekara tu lalu nyadika nya siti agenda besai dikemereat dalam pengidup,” ku Len madah nyemetak.
Iya mansutka jaku nya rambau Program Bai’ah Kasih diatur Serakup Apai Indai enggau Pengajar ( PIBG), Sekula Primari (SK) Muara Payang Sarikei.
Sama bisi datai Kepala Pengajar SK Muara Payang, Mahdi Ain enggau Chairman (YDP) PIBG SK Muara Payang, Impin Aking.
Program tu diatur dikena ngenegapka kaul di antara apai indai enggau pengajar di sekula nya.
Berebak enggau nya, Len ke mega Kaban Kunsil Nengeri (ADUN) Kuala Rajang meransang semua apai indai ti nyadi kaban PIBG di sekula ulih ngerapitka agi tanggam kaul enggau semua raban.
Ku iya, pegai tanggungpengawa ngemai penyulut di sekula nyadi tanggungpengawa begulai lalu ukai dilempai ba sepiak raban aja.
“Pekara bansa tu patut diperati enggau berat. Mar deka nyapai pemujur enti nadai pengeran ari semua raban.
“Nya alai, kitai ngarapka kaul rat antara raban PIBG enggau sekula patut diberat lalu nyadi siti agenda besai. “kaul enggau pemereti ati antara kedua raban deka ngemuntangka agi pengawa ngemai mayuh agi pemansang enggau pemujur ngagai sekula,” ku Len.
Ba program nya, Len mega bisi ngemendarka pemeri penyampau RM5,000 ngagai PIBG SK Muara Payang Sarikei.
Dulu agi ari nya, sebedau ngulu program nya, Len bisi ngelimpangka awak diri ngabas Palan Servis Parti Pesaka Bumiputera Bersatu (PBB) N41 Kuala Rajang, nganjung surat ngenang jasa ngagai ex-Menijar Lembaga Amanah Kebajikan Islam Sarikei (LAKISRI), Awang Bungkong Awang Shamsudin.