Pedagang diperansang meseti nyikap diri ngena penemu internet
MIRI: Bala pedagang diperansang nyikap diri empu enggau penemu internet seraya ngena teknologi enggau memanah ngambika enda tinggal sereta ngemansangka diri seriris enggau penyampat ubah ekonomi dunya.
Menteri Muda Pemansang Dagang Mit enggau Jelan Pemesai (PKS) enggau Menteri Muda E-Dagang, Datuk Naroden Majais mansutka pekara tu madahka agi tubah pekara patut dipelajar lalu bala pedagang patut sikar beratika ubah teknologi chukup jampat berubah.
“Kitai agi bedau ngena teknologi enggau naka ulih dikena mantu diri empu, kelebih agi dalam dagang lalu ambika chunto, dalam makit produk kitai, diatu kitai patut disikap ngena internet ngambika kitai ulih ngerembai enggau ngelakuka produk diri ngagai raban besai agi ba renggat dunya sereta dalam timpuh pandak tauka maya ti engkeman.
“Nyauka tetiap enam bulan teknologi udah ngubah chara dunya enggau gaya pengidup kitai ngereja pengawa nyengkaum dagang, kitai patut berubah seriris enggau tetiap ubah teknologi,” ku iya rambau pengawa bejadi muka Online Marketing Workshop ti diatur Opis Menteri Dagang Antarabansa enggau E-Dagang (MiTEC) di sebuah hotel ditu, kemari.
Ku Naroden ngaku, pengawa begunaka internet di mengeri tegap agi ari kandang menua pesisir, Kepala Menteri Datuk Patinggi Abang Johari Tun Openg udah merambu enggau ngagihka RM1 bilion ungkup infrastruktur Teknologi Pemadah enggau Arus Penyambung ( ICT) ngambika internet tegap agi di serata menua, nyengkaum di kandang menua pesisir.
“Kelimpah ari ngenegapka sambung internet, perintah mega numbuhka ‘Big Data’ ngambika penerang muntang enggau jampat diulih belalauka dagang, produk, bantu belanja, makit sereta ke bukai lalu aku minta bala pedagang ngerebut awak tu mega dikena nyual produk sida ngagai mayuh bengkah portal baka Sarawak Products Pavilion (SPP) ti ulih mantu sida ngerembaika dagang sida.
“Palan ngumpul meda deka ditumbuh dalam taun tu di Lawas, Tanjung Manis enggau Samarahan nyadika palan ngumpul asil enggau produk, pengawa meri gred ngagai produk, nungkus, ngatur pengawa ngelaku enggau ngaga iklan produk sereta deka ngemuntangka agi bala pedagang lalu nyadi palan bejualka produk menua tu, ba kededua dagang ‘online’ enggau ‘offline’,” ku iya seraya nambah MiTEC nyadi pelasar ba pengawa nyediaka bemacham bansa bantu ungkup bala pedagang ngemansangka diri empu.
Ku Naroden nambah silik, semua pengawa disediaka perintah dikena nyediaka belanja tegap ungkup Sarawak nyengkaum pengawa dagang enggau ungkup semua pemansang dudi hari.
“Pekara ti beguna endar iya nya semua patut nyediaka diri empu ngena penemu enggau pengelandik dalam bidang digital nyema sida enggau tinggal,” ku iya nambah.
Woksyop dua hari berunggu diatur berengkah ari 26 Febuari nya udah digulu 60 iku pedagang di kandang menua Miri lalu tuju iya ngemansang enggau nambahka penegap bala pedagang ari makit produk sida nengah e-Dagang.
Antara sida ke bisi datai kemari iya nya Sapit Sekretari Mendam MiTEC Sarawak Zulkarnain Masron enggau Pemesai Pelilih Miri Abdul Aziz Yusuf.