KM deka meri belanja dikena ngemanahka jalai di Marudi

MIRI: Kepala Menteri Sarawak Datuk Patinggi Abang Abdul Rahman Johari Tun Openg deka berundingka meri agih belanja dikena ngangkatmanah jalai di sitak Marudi ti suah ditunutng penusah ampuh bah.

Menteri Muda Kaunsil Kandang Menua enggau Kaban Kunsil Nengeri ( ADUN) Marudi Datu Dr Penguang Manggil madah bisi 12 buah jalai bisi udah jai lalu iya udah ngagihka belanja Projek Mit Pemansang Menua Pesisir (MRP) dikena nampal enda lama jalai belubang.

“Aku udah mai pekara tu ngagai YAB lalu ari penynu iya deka berundingka nya,” ku iya lebuhka ditanya sentang pengawa dipejalai dikena mutarka jalai ti rusak ti nekul pejalai sida ti tasah.

Jalai nya nyengkaum Jalai Peking enggau 11 jalai ke bukai.

“Sementara nya, aku deka nampung pengawa ngagihka belanja ari MRP dikena nyeleti jalai ti belubang seraya nganti agih belanja ari perintah nengeri dalam taun tu dikena ngangkatmanahka jalai tu ngagai jalai kerangan,” ku iya.

The Borneo Post bisi ngripot kena 25 Febuari tu tadi, lebih 800 iku peranak ari tujuh buah rumah panjai di semanjai Sungai Peking ngapil ngagai perintah mantu sida ngemanahka jalai ti rusak ti mar ditengah entukar maya musim pengujan.

Jalai Sungai Peking, lebih 18 km pemanjai ari Jalai Ladang PJP Ekang-Banyok enggau 22 km ari pasar Long Lama, bebali nyadi jalai luchak, nejuka peranak di menua nya nyauka putus kaul enggau dunya luar.

Apai indai mega bepanggai ba jalai nya beranjungka anak sida besekula ngagai Sekula Primari (SK) Sungai Peking, urung tiga jam deriba ari Mengeri Miri, maya hari manah.

Diatu mayuh belubang sereta lichau maya hari ujan, ngujungka jalai nya semina ulih ditengah entukar 4WD.

Deriba entukar 4WD ti bepeneleba mega tau lap ba jalai tanah luchak maya musim pengujan.

Musim landas ti berengkah dalam bulan November taun nyin tadi lalu semina ngetu ba Taun Baru China dalam tengan bulan Febuari taun tu ngujungka penusah bah besai mangka serata nengeri, nyengkaum sitak Marudi.

Nadai penusah bebadi nyawa diripot nyadi di Marudi tang keresa, jalai enggau utai tanam abis rusak pengudah penusah nya.

Dr Penguang seruran beratika pekara tu lalu opis iya udah ngempung lis bala pengundi iya ti tasah begunaka bantu rambau musim landas tu tadi.

Iya mega udah nganjung surat ngagai Opis Wang Nengeri ngambika nyaup iya ngagihka sekeda geran ari wang turu Maris dikena ngangkatmanahka sekeda jalai menua pesisir di sekeda kandang menua nyengkaum Sungai Peking, Logan Mulong enggau Long Lama ti patut diseleti enggau jampat.

Bekal ari agih belanja Projek Transformasyen Menua Pesisir (RTP) diagih ngagai sekeda jalai pandak ti semina ngaul dua tauka tiga km aja.

Begulai enggau Kaban Parlimen (MP) Baram, Anyi Ngau di Rumah Abok Anak Jabu di Ulu Teru kena 7 Januari taun tu tadi, iya udah nyuaka geran MRP ngagai Komiti Genturung Pendiau (RM 25,000), Rumah Bantan Anak Libau (RM 10,000) kelimpah ari ngemendarka bela penyampau RM60,000 di baruh RTP dikena nyeleti jalai Rumah Abok enggau Rumah Kalong.

Anyi mega bisi ngagihka RM10,000 ngagai JKKK Rumah Abok enggau RM7,550 ngagai Serakup Apai Indai enggau Pengajar (PIBG).