Nogeh deka nentuka Mas Gading seruran nerima pemansang
BAU: Penyandang sitak parlimen Mas Gading Datu Anthony Nogeh deka nentuka kandang endur nya terus dikemansang.
Nyadang diri sekali agi nyadi chalun Barisan Nasional (BN) ba Pengawa Bepilih Besai Ke-14 (GE14), juluk iya dekaka rayat di kandang menua pesisir bela ngasai perengka guna ke bisi di kandang mengeri.
“Kelimpah ari nya, kitai deka ngangkatka penatai pemisi peranak menua pesisir ke tebal agi ngemeran pengawa bekebun betupi,” ku iya.
Nogeh mansutka jaku nya ngagai pemberita pengudah bejadi Program Jalinan Tani di Kampung Opar, Bau.
Iya ke mega Sapit Menteri Betanam Betupi enggau Industri Asas Tani madah chukup sedia napi GE14.
Kenyau bulan Januari enggau ba taun ke udah, iya udah ngelawa ngagai mayuh genturung pendiau ngelingi Tasik Biru enggau Opar.
“Nyerumba pengerami Taun Baru China tu, aku udah ngelawa ngagai enam genturung pendiau komuniti China iya nya di Tondong, Buso, Bidi, Jambusan, Bau Lama enggau Sebuku,”ku iya.
Nogeh nambah kenyau 5 taun ke udah mayuh projek udah dibai ngagai Mas Gading.
Sekeda ari projek ku Nogeh iya nya pengawa ngangkatmanah jalai nyengkaum jalai kebun, melankin jalai nuju rumah sereta projek bekal ai graviti.
“Aku mega meri bantu belanja ngagai grija, surau, mesjid enggau komiti pengintu pengelikun enggau pemansang genturung pendiau,”ku iya.
Iya pechaya ulih menang besai ba GE14 ketegal sekeda pengundi ke nyukung penyakal rambau GE13 udah pulai nyukung BN.
“Ba GE13, seiku chalun iya nya ex -kaban parlimen tiga renggat mengkang ngembuan penyukung.
“Tang diatu semua penyukung iya nya udah pulai begulai enggau aku lalu aku ngarap sida nyukung BN,” ku Nogeh.