Tempa nembiak ti landik, pandai dalam teknologi
KUCHING: Sarawak enda tau enda nempa nembiak ti bepengelandik enggau pandai dalam teknologi setipak enggau nengeri tu ti beratka ekonomi digital.
Kepala Menteri Datuk Patinggi Abang Johari Tun Openg madah, laban dunya ke maya hari tu endang begunaka teknologi.
“Kitai enda tau enda nempa nembiak ke ulih meretika teknologi laban kemayahari tu semua pekara begunaka teknologi.
“Reti iya kitai patut nempa nembiak ke mayuh penemu lalu aku arapa bendar kitai ke apai indai deka nempa nembiak ti baka nya.
“Lalu aku arap bendar Sekula Antarabansa St Joseph ulih nempa nembiak ti bepengelandik enggau mayuh penemu,” ku iya lebuh bejaku seraya bejadika Sekula Antarabansa St Joseph enggau Hari Terbuka sekula nya ba Jalai Tan Sri Datuk William Tan ditu, kemari.
Lebuh ke ngenang pasal sekula antarabansa iya madahka nya mega sebagi ari sistem pelajar menua ke alai silibus ke dikena mega nitihka polisi pelajar bansa.
Iya madahka tebal agi sekula antarabansa di menua tu baka di Semenanjung tebal agi chara ngajar iya nya ngena teknologi baka silibus subjek disimpan dalam software IPad dibandingka ari bebaika bup ti kelalau mayuh.
Ngena teknologi nya mega ulih meri awak ngagai nembiak ulih terus betanya pasal pelajar taja pan benung di rumah, ku iya.
Iya arap bendar sekula antarabansa di nengeri tu ulih ngemeranka teknologi sereta ngarapka Sekula Antarabansa St Joseph ulih ngemeranka chara nya.
“Aku ukai madahka polisi pelajar bansa kitai enda manah tang tu patut ditambahka dalam polisi kitai,” ku iya ti enda setujuka sistem tauka polisi pelajar bansa ti seruran betukar laban nya ulih ngeruja pelajar nembiak.
Berebak enggau tu sekali agi Abang Johari ngenang sereta madahka Sarawak nyadika Jaku English jaku kedua dikemerat di nengeri tu setipak enggau pemansang teknologi diatu.
Kelimpah ari nya, Chairman Lembaga Pengarah St Thomas Private School, Tan Sri Datuk Amar Leo Moggie lebuh ke ngenang sekula nya meri puji sereta terima kasih ngagai perintah nengeri ti udah ngagihka belanja RM1 juta ke tuju ngaga sekula nya.
Sekula nya berengkah dike- na pun taun 2017 lalu naka ke diatu bisi nembiak lebih ari 100 iku, ku iya.
“Begunan baru sekula tu baru tembu sereta ditembuka dalam timpuh semilan bulan ngena ungkus belanja urung lebih RM9 million lalu Perintah Nengeri Sarawak meri ungkup belanja RM1 milion enggau pemeri ari ke bukai.
“Aku ngarika kami meri terima kasih ngagai semua ke meri lalu nyadika begunan tu nyadi nyata,” ku iya.
Sama bisi datai ngagai pengerami nya kemari Menteri Pelajar, Sains enggau Pansik Teknologi Dato Sri Michael Manyin Jawong, Menteri Kunsil Kandang Menua enggau Pengawa Berumah Datuk Prof Dr. Sim Kui Hian enggau Archbishop of Kuching, Archbishop of Kuching Simon Poh enggau ke bukai.