ILP Ke-4 di Sarawak deka digaga di Serian
SERIAN: Pengawa nasih tanah projek ngaga Institut Latih Industri (ILP) Serian deka diatur kena 23 Mac 2018.
Menteri Pengatur Pengereja Pengawa Dato Sri Richard Riot Jaem madah, berengkah ari projek deka digaga lalu disadang tembu dalam timpuh 2 taun.
“ILP Serian deka nempa modal mensia ke landik ba mayuh bengkah pengawa ke alai buding palan tu ila ulih endur 700 iku pematih.
“Aku pechaya palan tu ila deka meri peluang ngagai nembiak ke diau ngelingi Serian ngulihka pengelandik.
“Kitai ngarap nembiak di Serian enda tinggal ba pekara pengelandik,’ku iya ba aum pengarang berita pengudah bejadi Job Fair@ Serian Sarawak 2018 ke diatur di Balai Mayuh Guna, SJK Chung Hua, Serian kemari.
Riot ke mega Kaban Parlimen (MP) Serian nambah, bengkah kus ke disedia di ILP Serian bekaul enggau pinta Industri 4.0.
Ku iya, kitai deka nyendia kus ke tau nempa modal mensia ke landik ti ulih nangkup pinta pengawa puang ba Industri 4.0.
“ILP Serian mega deka disikap enggau perengkaguna sereta injin ti bekaul enggau industri 4.0 ti ulih mantu pematih,’ku iya.
Projek tu begunaka belanja lebih RM260 juta lalu nya nyengkaum kereja ngaga begunan enggau perengka guna belajar kelimpah injin, tandu Riot.
Sarawak diatu udah bisi 3 ILP iya nya di Miri, Kota Samarahan enggau Bintulu.
Ngenang kaul ke sama, iya madah pengelaku pematih ari ILP manggai 92 peratus.
“Tebal agi pematih ari ILP deka bulih kereja dalam timpuh 6 bulan pengudah nembuka latih,’ku iya.
Ngenang kaul bukai, iya madah nengah Atur Pemansang Malaysia Lumpar ke-11(RMK11) ke tembu ba taun 2020, 1.5 juta pengawa puang deka disediaka.
Ari penyampau nya ku iya, 60 peratus begunaka orang ke landik ba pengelandik teknikal enggau vokasional(TVET).
‘Diatu, peratus orang ke landik ba pekara TVET semina 28 peratus lalu mengkang jauh ari juluk 60 peratus.
“Kitai netapka tagit 35 peratus maya manggai ba taun 2020,’ku iya.