Lumba nyadi pelasar nempa nempa regas tubuh, runding
PAKAN: Bidang lumba endang nyadi pelasar pemadu manah dikena nempa nembiak ti regas tubuh enggau runding.
Kaban Parlimen Julau Datuk Joseph Salang Gandum madah, nengah latih ke meruan sereta digaga manah, lumba ulih nempa nembiak nya nyadi siku orang ke regas sereta mereti.
“Enggau nya, dia lumba deka mantu nempa siku atlit ke mereti, ngembuan disiplin, pengeransing sereta pengulih nyadi ketuai,” ku iya.
Salang madah munyi nya rambau nutup Pekit Lumba Kaunsil Lumba Sekula (MSS) Bagi Menua Sarikei Ke-44 ba Kompleks Sukan Pakan, lemai ensana.
Ngelansa pasal lumba, Salang madah nya ukai semina nentuka sapa champion ungkup sesebengkah main.
“Pekara ke lebih beguna iya nya pekit tu ulih meri penemu tambah ngagai bala nembiak enggau atlit iya nya pemujur semina ulih dijapai nengah pengeransing, langgur ke manah sereta penakal.
“Sigi nadai pemujur ke ulih dijapai enggau muntang iya nya nengah pengeransing ke nadai ngetu,” ku iya.
Chairman Kaunsil Penyanding Penemu 1Malaysia Sarawak nya mega madah, pekit nya mega nyadi pelasar endur nempa penyerakup, nanggam kaul basa enggau kerejasama enggau pangan diri.
Juluk kepenudi ila, ku iya deka nempa siti komuniti enggau peranak menua ke liat ati, sayauka menua sereta bela gauk ke pangan diri.
“Kelimpah nya, pengawa lumba mega ulih nempa penyerakup rayat pupu bansa. Nya kebuah, iya endang jalai ke pemadu manah nempa penyerakup nengah pengawa lumba, “ku Salang.
Ku iya mega, nengah pengawa lumba ke semampai diatur mega nyadi pagar ngagai nembiak ngambi enda teparuk ngereja ulah ti enda menuku.
“Kitai nemu nengah pengawa lumba, dia kitai ulih ngemansangka modal mensia kelas satu ti deka ngiring menua dudi hari ila,” ku tandu iya.
Pekit MSS Bagi Menua Sarikei tu dipasuk 843 atlit ari 16 kontinjen ke datai ari 13 sekula sekondari enggau tiga sekula primari.
Ba pengujung pekit, Sekula Sekondari (SMK) Julau 2 mujur ngempu gelar champion penuh.
Ba pengawa nya mega, Salang bisi nyuaka pemeri ari iya empu ngagai Vanessa Niega Franky ari SMK Julau ke udah nyereta Pekit Padang enggau Balapan Australia Barat di Perth ba main nikau besi mipau.