Belanja dikena Polis Sarawak besai ari nengeri bukai

KUCHING: Belanja ke diguna Polis Sarawak nyaup ngemujurka Pengawa Bepilih jauh besai enti dibanding enggau nengeri bukai.

Sapit Menteri Besai Malaysia Datuk Seri Ahmad Zahid Hamidi madah ngipak enggau gaya sitak menua bansa tu, polis Sarawak deka nerima bantu belanja ke besai agi ari Indu Opis Polis Bukit Aman dikena nentuka pengelanchar Pengawa Bepilih Besai ke14(PRU14), ku iya.

“Belanja ke diguna Polis Sarawak ngintu pengawa bepilih jauh besai enti dibandingka enggau nengeri lain.

“Aku dipadah, pejalai nengah jalai ai(sungai) enggau ari atas(bilun) nguna belanja ke besai lalu pia mega enti nengah darat.

“Aku nemu sekeda nya betengah jalai ke enda dipelankin kelebih agi di menua ulu ke mengkang nguna jalai batang,’ku iya.

Zahid mansutka jaku nya ba aum pengarang berita pengudah mendingka licha sentang atur ke udah diambi Polis Sarawak dikena nentuka PRU14 diadu enggau lanchar.

Licha ke diatur di Mess Pemesai Indu Opis Polis Kontinjen(IPK) Sarawak nya bela digulu Kepala Menteri Datuk Patinggi Abang Johari Tun Openg.

Zahid ti mega mangku pengawa Menteri Dalam Menua nandu baru madahkah, penyendia agih belanja ungkup pengawa bepilih sigi nyadi tanggungpengawa Bukit Aman.

“Aku deka meri perintah ngambika polis Sarawak nerima agih belanja ke chukup,” ku iya.

Taja pan enda nyaut tanya (ari pengarang berita) ni maya PRU14 deka diatur, Zahid semina madahka iya tepantup ati enggau gaya penyikap Opis Polis Sarawak.

Dulu agi ari nya, seduai(Zahid enggau Abang Johari) bisi ngulu pengawa baris ke diatur di Padang Kawad IPK.

Zahid diberi basa meresa baris ke diarika 99 iku raban polis enggau 2 iku pemesai kanan polis.

Bela datai ngulu atur pengawa nya kemari, Sapit Menteri dalam Menua Dato Masir Kujat, Sekretari Perintah Nengeri Tan Sri Datuk Amar Mohamad Morshidi Abdul Ghani, Ketuai Polis Sarawak Datuk Amer Awal, enggau pemesai polis ke bukai.