Forum Adat Iban keterubah nerima timbal ke chukup manah ari pesereta
KUCHING: Raban komiti pengatur Forum Adat Iban renggat keterubah berasai lantang meda pemanah timbal diterima ari bala pesereta ke bisi datai ngulu forum ke udah diatur 03 March tu tadi, di sebengkah hotel tebilang ditu, ti diatur begulai Serakup Dayak Sarawak (PEDAS) enggau Raban Pemikir Dayak tauka Dayak Think-Tank Group (DTTG).
Dalam jaku ngelalu dipansutka Sybestine Gambong, Chairman DTTG Kuching, batang tuju atur forum deka ngemai mensia mayuh ti rindu ngiri penemu sereta angkunka Adat Iban, ba mayuh bengkah sukut pekara, ti patut diangkat, dipebasa sereta dikemeran ungkup rebak diatu enggau dudi hari.
Nangkan nya ku iya, nyadi sebengkah Gempung Ukai Dikuasa Perintah ( NGO) bansa Dayak, endang patut sida berunding sereta ngatur forum ke bansa nya laban udah nyadi pangku pengawa sida nyadi kaban ti ngaul semua bansa Dayak.
“Kitai bela bisi tanggpengawa diri empu ba pengawa ngetan enggau ngemeranka Adat asal kitai bansa laban adat tu nyadi lalau ba pengidup kitai besehari sehari, taja udah megai pengarap baru, tang Adat endang patut ditan, ditali sereta ditampung.
“Adat enggau pengarap tu, dua bengkah pekara ti bisi bida, bisi lebas enggau bisi malin kitai ngereja iya. Ukai tau dikereja sengapa, bisi penti, bisi mega pemali, nya kebuah kitai bisi adat tauka tunggu,” ku iya ngelansa. Antara bala speaker ke bisi dikangau datai bekunsika penemu enggau jurai iya nya siku luyar bepeneleba lebih 50 taun di nengeri tu, Datuk Seri Daniel Tajem, penyanding penemu undang-undang PEDAS enggau ex-Sapit Majlis Adat Istiadat Sarawak (MAIS), NicholasBawinAnggat, enggau ex-Ketuai Bagi Iban di RTM, Thomas Tegung Laka.
Setipak enggau rambai jaku forum, Bejalai Betungkatka Adat, Tindu Bepanggalka Pengingat’ ke alai bala speaker ngemai bala pesereta nelusur sereta mulaika kenang sereta nyerungkai penatai adat bansa kitai Iban kelia.
Ari pengawa berumpangka menua, adat tikah, ngintu pemati nyentuk pengawa ngetas ulit bela bisi dipejurai rambau atur forum, nyengkaum penerang silik pasal adat jadi laki bini nitihka sempekat enggau penti pemali kitai bansa.
Pia mega, adat kitai Iban chukup siruka pengawa di tanah, nyengkaum adat tungkus asi ti dikemeran nyadika sempekat pemereti ati begulai enggau pangan diri. Awak ti sempil, dia agi tubah pekara bukai bedau tentu nyemetak dirintai, dikejaku sereta dipejurai, lalu pengawa main asal semina ngelansa aja.
Nya kebuah, ari tibak penemu siku ari speaker forum, tuai Thomas Tegung Laka, meransang bala komuniti ngatur baru forum ungkup siti agi batang jurai ngaul kitai bansa kelebih agi main asal benyawa baka berenung, beramban, nimang enggau ke bukai.
Ku iya, pekara tu beguna endar ngambika bisi dikelala sereta ditampung rebak baru lalu ba penemu iya empu, ti chukup angkunka main asal, iya endang sedia meri kerejasama sereta volunteer bejakuka pekara nya nyema dipinta.
Simpul jaku ari siku komiti pengatur, Victor Ason ke lalu nyadi Ketuai PEDAS Pampang Kuching, madahka forum renggat kedua deka diatur belalauka jaku peransang, sukung ari bala speaker sereta setuju ari bala komiti forum sekali tu.
“Ari kenang, tanya, saut enggau jurai kitai semua ditu tadi, agi tubah pekara bedau lenak ditusut, dirintai, disebut, diserenih kitai, awak enggau jam kelalu sempil endur kitai bekenangka semua batang jurai.
“Taja pia, ari randau kitai semua tadi, ba aku empu, chukup mayuh pekara ti udah dikunsi sekalika bala speaker tauka bala pesereta empu, ngemai kitai ngelala bisi bida adat nitihka ai tauka bagi menua siku-siku.
“Penerang pasal adat ti udah dikunsi semua kitai ditu patut ditusi, dipadah, diterang ngagai bala bukai, kelebih diri sebilik, ngambika kitai bela ampit nemu, sedar lalu bisi penaluk ba adat tu, kelimpah bebasaka tusun tunggu ba Adat kitai Iban,” ku Victor madah nyemetak.
Pia mega ku Victor, kitai bansa endang patut bisi pengeran enggau pengiruh ba pengawa ngetanka pesaka asal kitai bansa ti nyadi kelai enggau basa kitai ti bempu adat nya.
Nicholas Bawin ke nyadi siku ari speaker forum meri terima kasih ngagai semua raban ti bisi ngaul diri dalam forum ti ngemai empas chukup besai ngagai kitai bansa napi ubah dunya kemaya hari.
“Meri besai terima kasih ngagai bala ke bisi ditu, kelebih agi komiti pengatur ti udah beratika chara ke bansa tu dikena meri penyedar ngagai komuniti kitai ba pemesai guna Adat Iban tu.
“Aku ngarap sereta besampi mayuh agi pengawa ke bansa tu deka diatur ngambika bala komuniti mereti agi pasal hak enggau adat kitai. Bala nembiak endang diperansang ngatur iya,” ku Nicholas mansutka penemu iya.
Antara bala pengari ari NGO ke bisi datai nyengkaum ari Serakup Dayak Iban Sarawak, Sarawak Women for Women Society, Gerempung Bansa Dayak Sarawak Siol Kandis, Gerempung Ungkup Peranak Asal Sarawak, Akademi SADIA, Terabai Dayak Draf sereta bala ngatika diri ke bukai nyengkaum pelajar ari palan pelajar tinggi menua tu ti ngarika Gen-Y sereta bala menyadi kitai Dayak ari menua Kalimantan Barat.