Penegap penyerakup ti endang dikemeran peranak nengeri tu udah nyadi teladan ngagai nengeri sereta menua bukai
MIRI: Peranak Sarawak patut seruran ngetanka penyerakup enggau pengelantang ti udah lama dikemeran ngelama tu, ke mega nyadi teladan ngagai nengeri enggau menua bukai.
Kaban Kunsil Nengeri ( ADUN) Bekenu, Rosey Yunus mansutka jaku lalau tu madahka penegap penyerakup komuniti pupu bansa di nengeri tu sereta pemereti ati ti udah dikemeran kitai meseti anang ditejuka pia aja.
“Kitai diberekat idup bebaik begulai enggau pangan diri taja enda sama budaya, bansa enggau jalai pengarap,” ku Rosey rambau Chap Goh Mei renggat Pelilih Subis diatur di Gelanggang Bola Keranjang Sekula Primari Bansa (SJK) Chee Mung Batu Niah kena malam Hari Enam tu tadi.
Sama bisi datai Pemesai Pelilih Subis, Hussaini Bakir enggau Kapitan Pui Kuan Pen.
Kitai diberekat idup bebaik begulai enggau pangan diri taja enda sama budaya, bansa enggau jalai pengarap. Rosey Yunus ADUN Bekenu
Nitih ku Rosey, peranak Sarawak patut bendar agi gawa ukai semina nentuka pengelikun enggau pengelantang ke bisi diatu ditan tang mega nentuka rebak baru ngemeran sereta diajar pasal pemesai guna penyerakup.
Iya nyemetak madah kesemua budaya tu, diau dalam pengelantang deka nadai reti nyema nadai pemereti enggau bebatak asur antara kitai, nya kebuah serakup kitai ukai pekara kedua, tang patut dikemerat pulaika pemaik rebak dudi hari.
Ku iya, Sarawak patut nyingkang ke mua lalu nyadi chunto pemadu manah ba chara pupu bansa patut begulai sereta bekerejasaman nentuka pemansang seruran bisi.
“Komuniti Sarawak iya nya beserakup dalam pengelain enggau pupu bansa diau begulai dalam pengelikun enggau pengelantang sereta begulai enggau nyauka manggai 30 raban etnik,” ku iya.
Aram gawa begulai sereta ayan ngagai cunya nama kebuah Sarawak nyadi chunto pemadu manah ba penyerakup dalam pengelain, ku iya nandu.
Ku iya, iya berasai lantang meda pengawa udah digaga komuniti enggau serakup bansa China ngagai bala kaban sida sereta bala komu- niti di Niah, kelebih agi dalam sukut ngintu pengelantang enggau pelajar.
Iya ngarapka bala komuniti China seruran bejalaika pangku pengawa sida enggau bansa lain ditu ngambi gawa begulai dikena mai mayuh agi pemansang di Niah.