‘Program Sentuhan Rakyat’ UPP di Kpg Sentosa nerima timbal ti manah
SIBU: ‘ Program Sentuhan Rakyat’ Parti Rakyat Bersatu (UPP) mai pemaik ngagai raban kurang penatai pemisi di Kampung Sentosa ditu kemari udah nerima timbal chukup manah.
Chairman Kaunsil Servis Komuniti UPP Sibu Dato Andrew Wong udah nyadung brosur ngagai tetiap pintu rumah di kandang menua nya ti mungkur urung 1,500 buah rumah di skim pengentap baru pendiau dikena nentuka peranak ti diselinting enda dikelaung program nya.
Ku iya nambah, bala sida begunaka timpuh tiga hari endur nyadung ngagai semua rumah dia.
Program Sentuhan Rakyat UPP berengkah diatur ari pukul 9 pagi nyentuk tengahari, diatur UPP pampang Bukit Assek.
“Kami nyelinting endur pengentap baru pendiau laban ba penemu aku, pekara ti pemadu beguna iya nya ulih ngelawa rayat di kandang menua baka Kampung Sentosa lalu mega dalam bulan tu, kitai deka ngagai siti da agi di Kampung Bahagia Jaya, Teku ditu.
“Ari perati kami lebuh dua program bukai baka tu (dulu ari tu) – ba runding aku ‘Jualan Sentuhan Rakyat’ – sida ( pengatur) ngatur nya di mengeri. Bisi mega mayuh penyampau tubuh di pengentap baru pendiau ditu, ti bisi dirandau kami – madah ngagai kami sida enda ampit (dua program ke dulu) laban sida nadai meda di surat berita.
“Nya alai, kami ( UPP) mutuska datai ngelawa pengentap baru pendiau bejalaika program tu. Lalu baka tu chara kami gawa – kami enda mantai dalam surat berita. Kami empu nganjung bro- sur ngagai rumah ke rumah. Nya kebuah mayuh orang ditu sehari tu ( kemari),” ku Wong madah ngagai pengarang berita rambau atur program kemari, ke alai chairman pengatur, Andrew Ting Kee Nguan, Chairman UPP Pampang Bukit Assek Kapitan Ting Chek Ming mega bisi datai.
Ba pekara tu, Wong pechaya rayat ke diau di pengentap baru pendiau begunaka program tu lebih ari sida ke diau di kandang mengeri.
“Lalu udah nya, aku mega berunding enti sema bisi sekeda barang dipeda aku mudah agi ari RM1 tauka RM1.50 ( dalam program ke dulu) – ba penemu aku, nyangka enda ulih nulung mayuh, nya kebuah kami (UPP) ditu ke bendar nyuaka pemeri barang nadai bebayar ngagai rayat ti begunaka bantu.
“Baka ti ulih dipeda kita – tebal agi sida ke diau ditu pagi tu (kemari) – aku ulih madah 99 peratus – semua sida tu begunaka bantu,” ku iya nambah.
Ba lansa ke bukai, Kee Nguan ingat sida bisi nerima peminta ari peranak di genturung pendiau ba sekeda bantu.
Tekala nya sia berandau enggau bala ketuai JKKK di renggat 1 enggau 2 ngiga sapa bagi begunaka bantu ditu, ku iya.
Ku iya, nitih ku sida nya, tebal agi rayat ke diau di genturung pendiau ditu ari raban penatai pemisi baruh.
Iya nyebut ke alai tuju bukai ‘ Program Sentuhan Rakyat’ sida nyediaka servis nadai bebayar ba pengawa beperesa darah enggau mata, sereta meresa status enggau penerang bala pengundi.
Kee Nguan dipilih ngambi beratika timbal diterima ba program nya.
“Dikearap, nengah program tu – kitai ulih ngaul rayat ditu lalu gawa mai pemaik ngagai sida.”
Berebak enggau nya, ku Kee Nguan, bala sida mega bisi bejalaika pengawa ngambi kaban baru ungkup UPP pampang Bukit Assek.
“Pagi tu ( kemari) kami semina nerima sida ke diau di sitak parlimen Lanang –kandang menua Bukit Assek enggau Dudong aja. Dikearap udah tu, kami deka ngatur siti da agi ungkup sitak parlimen Sibu.”
Ku iya, sida bisi mega nerima sekeda sebana ditu baka jalai ampuh bah, nyadi menua suah dituntung penusah bah.
Ku iya, sida deka naka ulih minta bantu ari Sibu Municipal Council ( SMC) sereta gawa begulai mutarka penanggul nya.