BPBH ngemaru sistem wang dikena ngemanahka servis
BINTULU: Pengawa nyukung operasyen enggau nentuka pengawa ngatur aset inventori meruan agi sereta nambahka penau teknologi pemadah ti ulih nangkup pengerembai ti dikearap taun tu enggau dudi hari, Kumpulan Bintulu Port Holdings Berhad ( BPHB) udah ngemaru enggau nipakka sistem wang nengah sempekat enggau Portrade International Sdn Bhd.
Ketuai Pemesai Eksekutif Kumpulan BPHB, Dato Mohammad Medan Abdullah madah, tuju pengawa ngemaru enggau nipak sistem wang nya dikena nentuka servis ti diberi ngagai bala pelanggan sikar agi sereta dikemaru agi.
“Kami begunaka sistem ti engkeman sereta patut ngubah runding dikena nangkup peminta enggau servis pemadu manah ngagai bala pelanggan kami,” ku iya madah rambau pengawa nyain sistem wang baru, ngemai pemaik ba pemutar dagang Sage, Sage X3 enggau Sage 300 iku nyediaka orang gawa BPHB di Auditorium Lembaga Pelabuhan Bintulu ( LPB) Menara Kidurong kemari.
Pengawa besain nya antara Mohammad Medan, Ketuai Pemesai Operasyen Bintulu Port Sdn Bhd (BPSB)Omar Salleh enggau Ketuai Pemesai Eksekutif Portrade International Sdn Bhd, Peter Yap Seng sereta Menijar Besai iya, Lim Chee Wei.
Ku iya, sistem ti nitihka peminta kami baka di atas keretas, penekul enggau beratika rega dalam sukut ngatur pengawa profil risiko ti ulih diatur iya nya seriris enggau strategi semua raban.
“Rasional pejalai sistem wang baru mega dikena nyemelaka sistem ti dikena bekaul enggau infrastruktur, operasyen enggau nginjin dagang,” ku iya nambah.
Ku iya, tu deka manah agi disetipak dalam raban sarikat tu lalu kami mega bela berati pekara bekaul nyema bisi penanggul ba sistem, bekaul enggau pengelenyau chuan penerang enggau ke bukai tu begunaka sistem kediri empu lalu iya dikearap ulih diperati.
“Ke bendar, pemerat bekaul enggau empas iya, meruan, penerang diterima betul ba jam iya sereta ke bukai. Pengawa nyemela atur tama kereja enggau pemuktamad proses dagang iya dikena nentuka pemprosesan data lanchar enggau dikena nyukung polisi bukai dalam prosedur atur enggau konsituensi iya,” ku iya nerang.
Sistem tu ku iya, enda ulih diau enggau bejalai kediri kelimpah patut dikemaru ngambi ba endur iya sereta patut diperesa baru berindik ari kami bepun ari ejensi perintah tauka ngaul ejensi bekuasa ti nyangka pengawa enggau prosedur bisi bida laban kami nyadi sarikat ti dilis dalam bursa enggau sarikat korporat.
“Sistem tu patut ditesenih baru sekalika iya diteju pia aja tauka dikemanahka agi. Pekara bekaul patut ditanya lalu enda patut nganti kaunsil madah laban iya patut ngatur semua. Patut regas, jampat gawa, sikar enggau ke bukai kelimpah patut meri pemerat gudang data ngambika berurun agi, dianalisis enggau likun,” ku iya.
Ku iya, perintah nengeri Sarawak mega sedar bekaul sistem teknologi enggau chakah gawa bejalaika pekara baka laban pekara ti beguna bisi ketuai ti ngaul diri dalam pengawa tu lalu patut disedia berindik ari enti diadu memanah, kereja deka meruan agi ungkup semua belalauka peminta makit.
“Ngatur pengawa nadai keretas, nengah online enggau ngatur pengawa patut mansang ke mua laban semua tagit ila iya nya penyikar enggau empas iya,” ku iya.
Ku iya nerang, projek tu deka tembu 2 Januari 2019 ke alai skop iya mungkur bekal, nganjung, ngelekat, mansik, nyambung enggau ngintu pengawa begulaika wang, sistem wang, meli, ngatur kunterik, sistem sistem inventori enggau ngintu aset, ngena memanah pemutar atur dagang, Sage X3 enggau pekereja.
“Ngagai pekereja, semua udah ngaul diri dalam sistem tu ba hari keterubah. Ngena memanah sistem Sage, kami melabaka manah agi dalam chuan wang, dalam dagang, nambahka pemanah ngagai sarikat kumpulan ngaga pemutus, muai, ngurangka risiko ngagai pedagang. ubah pejalai ngena chuan dikena nempa pemutus dagang ti pintar,” ku iya.
Kelimpah ari nya ku iya, taun tu sida deka berengkah nerima projek, ngulu aum enggau pengawa latih sereta dikearap semua menijar ulih nentuka staf ngulu enggau ngena wak ngaul pengawa tu ngambika sida nemu agi chara ti dipejalai.
“Kami enggaika maya bisi sistem bala staf ila agi betapi pemar laban enda nemu chara ngena iya. Sistem iya nya kereban ukai mutarka semua pekara tang dikena ngemuntang pengawa, bisi pangka, sikar enggau ke bukai,” ku iya.
Ku iya, tu gawa ungkup bala staf bisi strategi agi, ngiga mayuh agi pelanggan sereta setipak enggau tuju iya, nentuka projek mujur, dianjung nitihka timpuh enggau atur pejalai sereta belanja efektif agi.
Ku iya, dagang iya nya mudah enggau iya begunaka orang ti bisi runding dagang, ngenataika `output’ enggau gawa begulai nentuka projek tu deka mujur.