Nyediaka palan endur ngibun dikena ngurangka jelu ti nadai orang ngempu

MIRI: Palan endur ngibun nyadi siti ari pemutar timpuh panjai dikena mantu ngurangka pemayuh jelu ti bekedayau tauka nadai orang ngempu, ditu.

Menteri Muda Dagang Temuai, Seni enggau Main Asal Datuk Lee Kim Shin madah, penatai jelu ti bekedayau tauka nadai orang ngempu tu ukai semina enda manah dipeda tang mega tau ngeruga pengelikun komuniti di menua nya.

“Pia mega jelu siga baka ukui enggau mayau deka ngemai igi penyakit ngagai mensia.

“Ambika chunto, virus rabies ti ngeruga pengelikun maya ukui tauka mayau ngetup tauka nyerang mensia,” ku iya lebuhka dirandau pengudah ngatur pejalai ngabas Program Vaksinasi Rabies di Balai Suarah Miri, kemari.

Sama bisi datai Datuk Bandar Majlis Bandaraya Miri Adam Yii.

Ku ADUN Senadin nya nerang, jelu ti bekedayau tauka nadai orang ngempu ke bisi bekedayau di palan digusung mensia mayuh baka kedai makai deka enda manah dipeda ngujung sida ti datai makai kia enda nyamai asai.

“Tu mega deka meri peragam ti salah sereta negetif ngagai mengeri besai Miri kelebih agi bala temuai enggau pengusung ari luar laban jelu tu ngasuh kedai dipeda kamah,” ku iya.

Nya alai, ba pekara tu ku iya, Lee merambu ngagai Ma- jlis Bandaraya Miri (MBM), sektor peribit enggau gerempung ukai dikuasa perintah (NGO) ngaga palan ngintu jelu ti bekedayau tauka nadai orang ngempu ditu.

Ku iya nerang, perambu tu dikena ngurangka pemayuh jelu nya, kelimpah pematut meri penyedar enggau kerejasama ari komuniti di menua nya ngambika enda muai anak ukui tauka mayau di sebarang alai.

“Perambu tu ukai deka mutarka penanggul nya, tang lebih agi dikena nyelamat enggau mantu jelu nya ngambika bisi palan ngintu enda lama.

“Sida ti enggau nupi jelu tu sekalika anak ukui tauka mayau, manah agi beri ngagai sida NGO baka Zero Stray arika dibuai,” ku iya.

Ba lansa bukai, bekaul enggau program nya, ku Lee, tu ketiga kali program baka nya diatur.

Ba dua program ke sama diatur di Dewan Suarah Miri enggau Taman Tunku, lebih 1,650 ukui udah dituchuk vaksin rabies enggau nadai bebayar.

Kelimpah ari nerima tuchuk rabies, Lee mega ngelalau pengempu ukui rejista lalu ngambi lisin nginang ukui.

Program bansa tu mega deka diatur baru tetiap Hari Minggu di endur bebida iya nya di Dewan Suarah Miri (11 Mac), Dewan Dato Permaisuri di Bandar Baharu Permyjaya (18 Mac) enggau di laman tamu baru di Desa Senadin kena 25 Mac.

Kelimpah ari vaksinasi ra- bies nadai bebayar, kaunter meri penyedar ngagai mensia mayuh pasal rabies mega disedia dikena nambahka penemu komuniti bekaul enggau pekara nya, kelimpah ngemujurka juluk mengeri Miri nadai virus Rabies.

Tu diatur kerejasama Residen Miri, Opis Servis Veterinar, Opis Pengerai Bagi Menua Miri, Majlis Bandaraya Miri, Zero Strays sereta mayuh bengkah gerempung bukai ditu.