Projek beungkus RM9 bilion nya mega deka ngemuntang pengawa nyambung jalai alun ngagai genturung pendiau ke ngelingi
KUCHING: Projek Tekat Ai Baleh ke beungkus RM9 bilion nyema udah tembu jemah deka nyungkak pengerembai aktiviti ekonomi ngelingi Baleh, ku Sapit Kepala Menteri Tan Sri Datuk Amar Dr. James Jemut Masing.
Iya madah projek nya mega deka ngemuntang pengawa nyambung jalai alun enggau perengka guna bukai ngagai genturung pendiau ngelingi.
“Jalai benung digaga ari Kapit nuju Palan Tekat Ai Baleh iya nya urung 100 KM. Nambahka nya jalai pemanjai 30KM mega digaga nuju Sungai Tunoh.
“Projek mega mungkur pengawa ngaga Jematan Baleh enggau Jematan Mujong sereta sekeda jematan ke bukai,” ku iya lebuh dikerandau bedau lama tu tadi.
Masing ke mega Menteri Pemansang Perengka Guna enggau Pengangkut nambah projek ngaga jalai nuju Palan Tekat Ai Baleh aja udah begunaka ungkus RM2 Biliun.
Ku iya, penyampau RM11 biliun dibai ngagai Kapit ngambi ulih ngerembaika aktiviti ekonomi ungkup pemaik rayat.
“Perintah udah nyendia mayuh belanja dikena ngemansang Kapit(Palan Tekat Ai Baleh).
“Atur tu meri peluang ngagai peranak di Baleh ngangkatka penatai pemisi diri nengah jalai alun ke digaga,”ku iya.
Masing ke mega Adun Baleh enggau nyemetak madah rayat meseti beambi ulih enggau perengka guna ke disedia perintah.
Anang nyalahka perintah jemah enti kitai enda ulih ngemansangka diri ketegal perintah udah nyendia perengka guna baka ke jalai alun, tandu Masing.
Nitihka penerang Masing, kereja di Palan Tekat Ai Baleh deka berengkah ba bulan Oktober 2018.
Diatu ku iya, pengawa ngaga ‘Diversion Tunnel’ benung dipejalai lalu pengudah nya tembu, kereja bukai deka berengkah.