Beri sukung penuh ngagai Nanta, iya chukup dinamik

KAPIT: Sapit Menteri Pemansang Menua Pesisir enggau Kandang Menua Datuk Alexander Nanta Linggi, Kaban Kunsil Nengeri ( ADUN) Pelagus Wilson Nyabong enggau ADUN Bukit Goram Jefferson Jamit Unyat bisi bejalai ngabas Genturung Baru Simpang Sesawa, km 6, Jalai Bukit Goram ngulu pengawa bejadika genturung pendiau baru ti mungkur 36 buah rumah.

Sama bisi datai Sekretari Politik Kepala Menteri Sarawak, Maurice Giri enggau Tapah Ata, Sekretari Peribit Kanan Sapit Menteri, Sylvester Insor Lingan, Pemesai Pekara Khas Sapit Menteri, Ambrose Abong Bugek, sereta bala bukai.

Ba pengawa nya, Jamit bisi mansutka pengaga ati ngagai Datuk Alexander Nanta Linggi ti udah dipadu nyadi Sekretari Besai PBB rambau Aum Besai Tiga Taun Sekali iya diatur di Kuching berengkah ari 8 ngagai 12 Febuari tu tadi. Jamit mega meri pengaga ati ngagai Susie Dominic ti udah dipadu nyadi tuai rumah.

Iya ngelalau peranak meri kerejasama ngagai tuai rumah enggau kaban Komiti Pemansang enggau Pengelikun Genturung Pendiau (JKKK) nentuka pemansang meruan sereta lanchar di genturung pendiau sida.

Iya mega muji peranak dia ulih ngatur sereta nempa pemanah rampa di genturung pendiau sida.

Ku iya, berindik ari genturung pendiau nya baru digaga, tentu mayuh pekara ulih diperambu ungkup pengelantang peranak dia. Iya beratika bekal ai paip, kuasa karan enggau arus penyambung bisi dibekal ungkup pengelantang sida.

Bala nembiak mega ku iya ulih belajar di pra sekula besemak enggau Rumah Madang di Sungai Pelajau, Bukit Goram. Ku Jamit, kesemua pemansang tu dibai perintah.

Ku iya, Bukit Goram diatu disambung ngagai pasar lalu mayuh pengempu tanah berumpangka tanah sida sereta bejualka sayur enggau buah di pasar ngulihka belanja. Ari infrastruktur enggau penyikap perengka guna pemun, diatu sida ditu diau lantang.

“Enda lama agi kitai deka napi Pengawa Bepilih Besai (PRU) milih Kaban Parlimen (MP) Kapit, ke alai penyandang iya Datuk Alexander Nanta Linggi. Iya (Nanta) udah ngayanka diri chukup dinamik, bagas sereta pengari rayat ti dikerindu.

“Kenyau ari nyadi MP udah nyadi dipadu nyadi sapit menteri, Nanta udah bejalaika mayuh projek pemansang di Kapit dikena ngangkatka tikas pengidup.

Ambika chunto, rumah panjai di sepanjai Jalai Bukit goram, Jalai Sungai ulu yong, Jalai Antaroh, Jalai Kapit- Song diatu udah disambung.

“Rayat ulih deriba ngena entukar sangkai ba mua pintu. Pia mega Bekal Kuasa Karan Menua Pesisir mERI pemaik ngagai peranak rumah panjai ke alai sida diatu ngasaika kuasa karan 24 jam ti mudah sereta ulih dikeandal,” ku Jamit madah nyemetak.

“Endang baka selama sebedau pengawa bepilih besai, bisi orang regas ngelakuka diri empu nginti sukung nyadi chalun. Baka ti udah disebut aku tadi, kesemua pemansang tu datai ari perintah. Orang ti ngatika diri tauka penyakal semina nyakal aja lalu aku ngelalau anang kiruhka sida tu laban sida enda ulih mantu kitai.

“Maya bepilih ila, aku meransang bala kita meri sukung nadai bebagi ngagai Nanta, ngambika iya ulih pulai ngagai Parlimen enggau majoriti besai.

“Kitai deka nganjung pesan nyata ngagai Menteri Besai ke alai peranak Kapit nyukung Nanta laban kitai agi begunaka iring iya nyadi ketuai sereta ulih mai pemansang ngagai kitai,” ku Jamit.

Berebak enggau pejalai nya, iya bisi ngemendarka belanja penyampau RM18,000 ngagai JKKK.

Nanta ngemendarka projek beungkus RM360,000 (RM10,000 sepintu) seraya Nyabong ngagihka RM5000 dikena bejalaika mayuh bengkah aktiviti ti udah diperambu JKKK.