Raban penanyi, komposer lagu Iban patut lebih kreatif
SKRANG: Raban penanyi sereta komposer lagu Iban patut kreatif maya nempa lagu ti manah ngambika mensia mayuh berasai rindu ninga iya.
Kaban Kunsil Nengeri (ADUN) Engkilili Dr Johnical Rayong Ngipa madah, semina lagu ti manah enggau tetangkupka peminta peninga sereta sida ti rinduka lagu Iban aja ulih nentuka lagu ditengkebang sida tau dijual lalu meri penatai pemisi ngagai serikat pengeluar, komposer sereta penanyi.
“Kemaya hari tu mayuh penanyi baru ngasuh dunya pemerindang di menua tu kelebih agi di Sarawak majak richah lalu ninting hari bisi pengawa ngelakuka lagu baru,” ku iya.
“Taja pia, ukai semua lagu enggau penanyi baru sereta sida ti udah veteran ulih diterima bala peminat laban bisi maya lagu ditengkebang sida kurang ngemantup ati laban digaga berumban dataika iya nejuka pemanah lagu enggau peminta bala peninga,” ku iya.
Iya mansutka jaku nya lebuh bejaku ba Pengerami Ngetas Ranyai nyerumba pengawa Ngerikod Lagu-Lagu Gawai Dayak 2018 begulai enggau penanyi Kaban Muzik Production (KMP) di Skim Skrang ditu, kilah ensana.
Ku iya, semua nemu bala peninga kemaya hari chukup milih lagu dikerinduka sida laban sida ti meli lagu nya.
“Nya kebuah tentu sida semina deka milih lagu pemadu manah sereta engkeman enggau peminta sida,” ku iya.
Pia mega ku iya, kemaya hari semekih dalam makit DVD enggau VDC lagu laban bala peninga udah bisi pilih bukai, ngambi lagu nadai bebayar nengah Youtube, kelimpah chelak tiru.
“Tang aku pechaya lagu ti manah kelimpah ari penyanyi bisi peminat sida empu deka ngasuh lagu sida diterima,” ku iya seraya madah suah ninga lagu Iban lebuh ‘Suara Emas’ lalu lagu nya enda kala leju didinga.
Ku iya, komposer enggau penanyi patut mendingka pejah ti manah ari peminat kelimpah ngaga pansik lenak ba lagu sebedau ditengkebang nyadi lagu ngambika iya tetangkupka peminta mensia mayuh.
“Mayuh macham bansa muzik enggau leka lagu seriris enggau dunya kemaya hari lalu enda patut semina ngemeratka tiun lama aja laban semina muzik baru ulih besemekih dalam dunya pemerindang ti majak kompleks,” ku iya madah nyemetak.
Ngelansa silik agi, Dr Rayong meri pengaga ati enggau terima kasih ngagai raban KMP laban udah milih Skim Skrang nyadi endur pengambaran video klip lagulagu Gawai 2018 dikeluarka sarikat nya.
“Tu mega deka mantu ngelakuka menua Skim Skrang ngagai mata mensia mayuh laban nyangka bisi sekeda bedau nemu pemanah rampa menua genturung pendiau komuniti Iban ditu ti disikap ngena perengka guna infrastruktur taja iya di menua pesisir,” ku iya.
Pia mega ku iya, tu mega mantu ngangkatka nama Engkilili ti deka nyadi pelilih mit baru di bagi menua tu laban penuduk iya ti nyelai antara Betong, Lubok Antu enggau Sri Aman.
Berebak enggau nya, Dr Rayong mega bisi nyuaka geran MRP ngagai Kaban Komiti Besai Skim Skrang penyampau RM5,000 seraya produksi KMP nerima RM8,000.
Sama bisi datai iya nya Menijar Besai KMP Jesley Jabu, Ketuai KMP Gibson Richard, Penghulu Betuk Tubi, Chairman Serakup Tuai-tuai Rumah DUN Engkilili TR Johnson Damu, bala kaunsilor, tuai rumah, artis KMP sereta peranak diau ngelingi Skim Skrang.