Gerempung Main Asal Taiwan nemuai ngagai Kampung Opar

KUCHING: Raban ari Gerempung Main Asal Taiwan datai nemuai ngagai Kampung Opar di Bau bedau lama tu tadi.

Penemuai 30 iku raban gerempung nya diambat Sapit Menteri Betanam Betupi enggau Industri Asas Tani ke mega MP Mas Gading Datuk Anthony Nogeh.

Diuluka Sapit Menteri Komiti Peranak Asal Taiwan, Chung Hsing Hua, sida dulu dibai ngagai ‘Baruk’ ke alai pengawa miring bisi diadu.

Di ‘Baruk’ sida diberi awak meda antu pala ke bisi digitang diak.

Pengudah nya sida dibai ngagai Balai Mayuh Guna Kampung Opar lalu diambat peranak genturung pendiau nya.

Tanda asal raban bansa Bidayuh engau pemakai asal Bidayuh bela dinah. Sekeda temuai ari Taiwan bela dibai betanda nitihka alun tabuh ajat Bidayuh.

Nogeh ba jaku nerima temuai madah pengawa sehari nya nyadi sebengkah atur ngangkatka dagang temuai di Mas Gading.

“Kitai keran mai orang dagang temuai ari menua China enggau menua bukai sereta ari Semenanjung Malaysia datai ngelawa palan ke manah di Mas Gading,’ku Nogeh.

Mas Gading ku Nogeh ngembuan mayuh palan pematak temuai lalu semua palan nya meseti dikelaku ungkup pemaik ekonomi peranak ke diau ngelingi sereta nengeri.

Siku temuai ari Taiwan, Liu Mei Lan lebuh dikerandau madah diri berasai andal enggau peranak Kampung Opar ti udah ngenah sida enggau manah.

Taja pan enda tentu landik ba jaku English, iya madah peranak Sarawak chukup nelap sereta mentas.

“Pemakai ke dinah ngagai kami pan chukup nyamai...Terima kasih ngagai orang Sarawak,” ku iya.