Sarawak deka bisi tiga jalai besai dalam timpuh sepuluh taun Projek jalai nya mungkur Jalai Besai Tebing Tasik, Jalai Besai Borneo enggau perambu ngaga jalai alun besai kedua ari Kuching
KUCHING: Dalam kandang sepuluh taun ti deka datai tu ila, Sarawak dipelabaka deka ngembuan tiga jalai alun besai, ke deka digaga enggau ungkus urung RM11 bilion, ke mega deka ngemuntangka agi pejalai prengka pengankut darat, ku Sapit Kepala Menteri Tan Sri Datuk Amar Dr James Jemut Masing.
Perambu nya ku iya, ngambika ulih nyendiaka pengelanchar deriba ari ditu ngagai pasar besai sereta nengeri di serata menua tu.
Sistem tiga jalai besai di Sarawak nya, Jalai Besai Tebing Tasik, Jalai Besai Borneo enggau perambu jalai alun besai kedua, ti deka nyambung Kuching, Samarahan, Sri Aman, Betong enggau Sibu.
“Opis menteri kami udah bejuraika pekara tu (ngaga jalai alun besai kedua) enggau Kepala Menteri sereta Sekretari Wang Menua, lalu kami udah besetuju, iya nya perambu tiga batang jalai alun besai nya deka digaga dalam kandang 10 taun tu, lalu ungkus ke diperambuka dalam urung RM11 bilion.
“Ungkup nya deka disedia kediri empu, reti nya ukai ngelun ari Perintah Besai, nya kebuah projek nya ukai digaga perintah besai, tang perintah nengeri,” ku Masing madah lebuh dikerandau pengarang berita ‘The Borne Post’ di opis iya di Bangunan Baitulmakmur ditu, kemari.
Iya nandu baru madahka perintah nengeri merambu deka nyendiaka pengelanchar driba ari Sematan datai ngagai Miri, enti Jalai Alun tebing Tasik nya tembu, nyengkaum ngaga 5 buah jematan besai dalam timpuh nya.
“Jalai alun besai kedua nya ila deka ngurangka timpuh bejalai ari Sibu ke Kuching dalam kandang dua setengah jam, tang enti nengah jalai besai Pan Borneo ( PBH), nyangka deka makai entara lima ngagai enam jam,” ku iya.
Iya madah jalai alun besai kedua deka pansut ari jalai PBH berengkah ari Betong, Sri Aman, Lingga, Sebuyau , Samarahan enggau Kuching.
Iya nandu baru madahka perambu jalai alun besai kedua nya enggau jalai niti tebing tasik deka ngurangka timpuh pejalai ari Kuching ngagai Sibu tauka pulai ari nyin.
“Nya alai, jemah ila, kitai deka ngembuan tiga batang jalai alun besai ari tu ke Sibu, berengkah enggau PBH, lalu ditangkan enggau jalai alun besai kedua lalu ketiga, jalai alun niti tebing tasik. Pemisi ketiga-tiga sistem jalai alun tu ila, Sarawak deka jauh agi mansang,” ku iya.
Ba lansa bukai, Jalai Serian-Tebedu dalam penyauh 40km, ku Masing, iya sama mega digaga manah agi ngagai jalai begembar, enti Inland Port (Pengkalan Darat) di Tebedu dibuka.
“Jalai nya ila deka digaga manah agi enti palan penyangkai di Tebedu nya udah digaga manah agi, nyengkaum ngulihka pemendar ari Perintah Indonesia. Pemisi jalai nya ila, deka ngemuntangka agi pengelanchar trafik,” ku iya.
Enti dibanding enggau jalai baka ke diatu, jalai siti lurung kelalu sempit , lalu nambah enggau nya enda ngipakka pengawa dagang entara garis menua entarabansa. Jalai Tebedu nya suba digaga ulih Konsortium Peranchis dalam taun 1990 lebih.
Ba lansa bukai mega, Masing madah iya udah berandau enggau Menteri Kereja, Datuk Seri Fadillah Yusof ke pemerat menua tu ke minta bantu Perintah Besai ngemanahka agi jalai sereta infrastruktur ke udah jai laban ampuh bah ke ditapi ulih sekeda pelilih menua, lalu ungku ngemanahka jalai nya dipelaba deka ngena belanja dalam urung RM500 juta. MIRI: Parti China ke endang asal ari menua Sarawak empu, baka SUPP enggau UPP enda tau enda bekerejasama dalam siti palan ke pemaik komuniti China sereta pulai baru ngundi BN dalam PRU14 tu ila.
Penulung Khas ngagai Menteri Muda Pengawa Dagang Temuai, Seni enggau Adat Pesaka Datuk Lee Kim Shin, Eric Chin madah, nya barang ku penemu kededua presiden parti SUPP enggau UPP mutuska pengabis manah iya chara kededua parti nya nyerakup komuniti China.
“Manah agi ke SUPP enggau UPP bekerejasama sereta beserakup, ngambika komuniti China pulai baru ngundi maya PRU14 tu ila,” ku Chin maya nimbal pengarang berita bekait enggau jaku ke dipansut ulih presiden SUPP enggau UPP ke madahka deka bekerejasama napi PRU14 tu ila.
Ku Chin, enti kededua parti ulih bekerejasama sereta nyerakup kaban parti, pemerat tu deka matak pengundi China pulai baru meri sukung sida iya ngagai BN.
Iya nandu baru madahka kededua pemesai parti, baik nya SUPP enggau UPP mesti berani ngambi singkang, ngasuh komuniti China pulai baru ngundi BN, ke pemaik sida iya.
Sebedau nya chairman UPP sitak Pujut, Bruce Chai madahka, enti nitih iya empu, lalau nya disambut enggau manah laban pemerat ke bendar, pemerat komuniti, enda ngira China, Melayu sereta orang asal menua tu ke deka meda SUPP engga UPP beserakup.
Ku Chai, pemerat ke bendar, pemerat komuniti sereta anang ibuhka penyarut ke udah tang betatika polisi gawa ke komuniti sereta ngemansangka menua.
“Pemerat kediatu, UPP enggau SUPP tegap bediri, beserakup napi PRU14,” ku iya.
Iya nandu baru madahka, dalam surat berita kemari, Sapit Presiden BN, Datuk Seri Zahid Hamidi pechaya kededua parti tu deka samasama bekerejasama napi PRU14.
Ku iya, Zahid bisi madahka dalam gempung BN deka beratika sapa ke dipilih nyadi chalun tu ila, baik nya ari SUPP tauka UPP, sukung ke sebaka sereta barang bantu ari BN pan sama sebaka.
“Ke UPP, aku pechaya kami ari UPP sigi ngembuan kaul ke manah enggau SUPP nyengkaum komponen parti BN bukai,” ku iya.
Kami udah besetuju, iya nya perambu tiga batang jalai alun besai nya deka digaga dalam kandang 10 taun tu, lalu ungkus ke diperambuka dalam urung RM11 bilion. Tan Sri Datu Amar James Jemut Masing Sapit Kepala Menteri