Penanggul ai di Serian ketegal batang paip ti pechah
SERIAN: Batang paip di Jalai Louis semak Bulatan Serian pechah baru, ngujungka nyauka semua opis perintah, kedai makai sereta mensia mayuh ke diau di pasar nya napi penusah nadai ai.
Kaban Kunsil Nengeri (ADUN) Bukit Semuja, John Ilus lebuh ngelawa endur nya kemari madahka, penanggul tu suah udah nyadi lalu minta iya dikemutar enggau lengkas.
“Kuntriktor ke ngaga jalai besai Pan Borneo ( PBH) madahka sida iya udah nemu endur bagi batang paip ke pechah, tang diatu agi nganti perengka kena nganti ti udah dipesan ari Kuching.
“Kami ngarapka penanggul tu deka dikemutar enggau lengkas laban mayuh palan dagang madahka dagang sida iya enda baka selama, lalu nambah enggau nya, Sepital Serian berat begunaka ai beresi enggau jampat, kena ngubat orang sakit.
“Tu kedua kali sepital nya kena penusah, lebuh napi penanggul ke sama dalam bulan Februari tu tadi, nyengkaum genturung pendiau dalam kandang Pasar Serian, baka Kampung Pasir, Kampung Kakai, Kampung Stabun, Kampung Kemayau,” ku iya madah lebuh dikerandau kemari.
Iya nandu baru madahka sebedau tu, kena 13 Februari tu tadi, sida iya bisi baum enggau Opis Residen Serian, bekait enggau penanggul nya, ke betuaika Residen Serian empu.
Taja pia, John madah enti pengawa nyambung batang paip nya enda ulih di anti, ngarapka Opis Bekal Ai Menua Pesisir (JBALB) tauka kuntriktor PBH nganjung ai enggau lengkas ngagai Sepital Serian ke berat begunaka ai diatu.
“Dipinta JBALB tauka kuntriktor PBH ulih nganjung ai enggau lengkas ngagai Sepital Serian dulu, ke berat endar begunaka ai diatu,” ku iya.