Sarawak ngining pengelandik Singapore dalam pekara digital
SINGAPORE: Perintah nengeri Sarawak betatika pemerat ngaga kerejasama enggau perintah menua Singapore dalam pekara digital.
Kepala Menteri Datuk Patinggi Abang Johari Tun Openg dalam penemuai iya ngagai Singapore, bisi baum enggau Sapit Menteri Besai republik nya, Tharman Shanmugaratnam bekait enggau pekara digital di sebengkah hotel ditu, kemari.
Rambau pengawa nya, Kepala Menteri enggau bala pengari Perintah Nengeri Sarawak nyengkaum Sapit Kepala Menteri, Datuk Amar Douglas Uggah Embas enggau Tan Sri Datuk Amar James Jemut Masing, Sekretari Perintah Menua, Tan Sri Datuk Amar Morshidi Ghani, enggau Sapit Sekretari Perintah Menua, Datu Sabariah Putit dinsh makai tengahari begulai enggau Tharman.
Dalam atur pengawa penemuai dua hari ngagai Singapore kemari, begulai enggau Kepala Menteri, Sekretari Perintah Menua Tan Sri Datuk Amar Morshidi Ghani bisi nguluka sekeda pengari kaban kunsil Opis Penguasa Multi-media Sarawak (Sarawak Multi-media Authority tauka SMA) ngelawa ‘Singapore’s Smart Nation and Digital Government’ ( SSNDGO), alai sida bisi diberi penerang bekait enggau pengawa opis nya.
Nitihka penerang nya, kededua opis baruh pegai Opis Menteri Besai merambu sereta betatika projek besai ‘ Smart Nation’, nguluka transformasyen opis perintah, ngemujurka opis perintah dalam timpuh ke panjai, sereta ngangkatka penyereta ari mensia mayuh enggau industri, sama enggau ngulu pemujur ‘Smart Nation’.
Kilah ke tengahari, Sapit Kepala Menteri Tan Sri Datuk Amar James Masing enggau raban pengari bukai ngelawa sereta diberi penerang bekait enggau pengawa Opis Penguasa Pemansang Media Infocomm Singapore (Singapore Infocomm Media Development Authority tauka IMDA).
IMDA iya nya siti badan berkanun ke ngemansang, ngemujur sereta bejalaika Infocomm begulai enggau sebagi ari pampang media, ngenegapka pampangnya enggau mayuh macham peluang nengah pemerat pengelandik, pansik, inovasyen sereta peluang kereja baru, kelebih agi ba entara industri mit enggau jelan pemesai (SME) di Singapore.